Fimm hundruð manna samkomubann og grímuskylda

Opnunartími veitinga- og skemmtistaða verður styttur um tvo klukkutíma. Þannig þurfa veitingastaðir með vínveitingaleyfi að loka klukkan ellefu og rýma staðinn á miðnætti. 

Þetta kom fram í máli Svandísar Svavarsdóttur heilbrigðisráðherra að loknum ríkisstjórnarfundi í Ráðherrabústaðnum við Tjarnargötu. 

Allt að 1.500 geta komið saman að því gefnu að allir framvísi neikvæðri niðurstöðu úr hraðprófi og beri grímur. Svandís sagði ekkert því til fyrirstöðu að jólatónleikar fari fram og leikhús haldi starfsemi áfram sömuleiðis.

Gildir í fjórar vikur

Breytingar á grímuskyldu taka gildi á morgun líkt og áður segir en aðrar breytingar miðvikudaginn 10. nóvember. Gildir reglugerðin í fjórar vikur eða til og með 8. desember. 

Börn sem eru fimmtán ára og yngri eru undanþegin grímunotkun. Starfsfólki sem veitir einstaklingsbundna þjónustu sem krefst nándar, til dæmis hárgreiðslu, nudd og viðlíka, er ekki skylt að bera grímu.

Framhaldsskólanemar mega taka niður grímu eftir að sest er í kennslu þótt ekki sé hægt að viðhafa eins metra nálægðarreglu.

Náðuðu þið samstöðu um þetta?

„Það voru svona deildar meiningar um niðurstöðuna en ábyrgðin er hjá mér svo ég ber ábyrgð á niðurstöðunni,“ segir Svandís.

Aðspurð um hvaða leið aðrir ráðherrar sem voru ósammála þessari ákvörðun hafi talað fyrir segir Svandís að þeir þurfi að tala fyrir sig.

Hún bætir við að minnisblað sóttvarnalæknis hafa verið öðruvísi en áður. Til að mynda hafi hann farið yfir fyrri takmarkanir og lagt til að horft yrði til hverrar fyrir sig eða þeim blandað saman. Hún hafi valið að fara vissan meðalveg og upplýst Þórólf um það.

Fram kemur í minnisblaði sóttvarnalæknis að hann telji hertar takmarkanir innanlands nauðsynlegar til að forða því að neyðarástand skapist í heilbrigðiskerfinu með ófyrirséðum aðgerðum. Ná þurfi daglegum fjölda smita niður í 40 til 50 og viðhalda þeirri stöðu með takmörkunum þar til betra ónæmi næst í samfélaginu með örvunarbólusetningum og náttúrulegri sýkingu.

Aldrei fleiri greinst á einum degi

167 greindust innanlands með Covid-19 í gær og hafa aldrei verið fleiri á einum sólarhring. Sextán eru nú á sjúkrahúsi vegna Covid-19, en voru sautján í gær. Fimm eru á gjörgæslu.

„Ef við gerum ekkert lendum við bara illa í því og þá förum við að lenda í verulegum vandamálum á spítölunum,“ sagði sóttvarnalæknir í Bítinu á Bylgjunni í morgun.

Vitað sé hvað þurfi að gera til að komast fyrir bylgjuna þar sem fyrri ráðstafanir hafi virkað til að hægja á faraldrinum. 

„Við verðum bara að gera það, hvort sem okkur líkar betur eða verr,“ sagði Þórólfur. Sóttvarnalæknir tilkynnti fyrr í dag að hann mæli nú með því að allir sextán ára og eldri fái þriðja skammt bóluefnis gegn Covid-19. 

Í tilkynningu sagði hann að Covid-19 tilfellum haldi áfram að fjölga og farið sé að bera á auknum alvarlegum veikindum, innlögnum og aukinni þörf fyrir gjörgæslumeðferð. Þess vegna sé gagnsemi örvunarbólusetningar til að efla varnir fólks orðin klár.

Frá því að bylgja faraldursins sem nú gengur yfir tók að rísa um miðjan júlí hafa tæplega 7.300 greinst með Covid-19. Þá hafa um 160 lagst inn á sjúkrahús, 33 á gjörgæsludeild, 17 þurft á öndunarvél að halda og fjórir látist.

Samantekt úr tilkynningu heilbrigðisráðuneytisins

Fréttin hefur verið uppfærð.