Kolbeinn fékk leyfi á Íslandi en enn óvíst hvort hann snúi aftur til æfinga

Íþróttastjórinn, Pontus Farnerud, segir við Göteborgs-Posten að Kolbeinn þurfi að sinna „líkamlegri og andlegri“ meðferð og að síðarnefnda meðferðin sé umtalsvert mikilvægari.

Kolbeinn hefur ekki æft með Gautaborg frá því í lok ágúst. Þá varð opinbert að hann hefði greitt tveimur íslenskum konum miskabætur vorið 2018, eftir að þær kærðu hann fyrir meint kynferðisbrot og líkamsárás haustið 2017.

Gautaborg rifti ekki samningi við Kolbein en sendi frá sér yfirlýsingu þess efnis fyrir sex vikum að félagið hefði rætt ítarlega við leikmanninn og sett upp langtímaáætlun fyrir hann. Meðferðin átti meðal annars að byggja á gildum IFK Gautaborgar, ábyrgð félagsins og skyldum sem vinnuveitanda.

Fannst hann þurfa að komast í burtu

Farnerud segir að Kolbeinn hafi fengið leyfi til að dvelja á Íslandi í september, eftir að hafa gengist undir aðgerð, en sé nú kominn aftur til Svíþjóðar. Hann er þó enn ekki farinn að æfa með liðinu. Af hverju ekki?

„Til að byrja með þá var mjög takmarkað hvað hann gat gert. Honum fannst hann þurfa að komast í burtu og að það væri mikilvægt fyrir okkur sem lið að geta einbeitt okkur að réttum hlutum. Að þjálfararnir gætu einbeitt sér að leikmönnum sem væru til taks,“ sagði Farnerud við GP. 

Farnerud gat ekki staðfest að Kolbeinn myndi mæta aftur á æfingar hjá Gautaborg. Tímabilinu í Svíþjóð lýkur í byrjun desember og samningur Kolbeins rennur út í lok árs.

„Þegar það kemur að næsta skrefi, endurhæfingaræfingu í fótbolta, þá munum við sjá hver lendingin verður,“ sagði Farnerud.

Líkaminn ekki orðinn klár en hitt mun mikilvægara

Miðað við orð Farneruds er ólíklegt að Kolbeinn komi til greina í íslenska landsliðshópinn sem spilar síðar í þessum mánuði, hafi Arnar Þór Viðarsson þjálfari á annað borð áhuga á að velja leikmanninn eða Kolbeinn áhuga á að spila með landsliðinu. Hann talar um tvenns konar endurhæfingu Kolbeins; líkamlega og andlega.

„Í augnablikinu er hann ekki hundrað prósent klár í slaginn líkamlega. Fyrr eða síðar verður hann kominn í lag líkamlega en það mikilvægasta fyrir okkur er seinni hlutinn. Ég held að menn verði að sýna virðingu gagnvart þessari stöðu. Fyrst og fremst varðandi Kolbein sem gengur í gegnum erfiða tíma en hefur sýnt metnað til að bæta sig bæði líkamlega og andlega,“ sagði Farnerud en vildi ekki tjá sig neitt nánar um andlega endurhæfingu leikmannsins eða hvað í henni fælist.

Auðveldara ef samningur Kolbeins væri lengri

Samningur Kolbeins við Gautaborg rennur út um áramótin og samkvæmt GP hefur ekki verið tekin ákvörðun um hvort honum verði boðinn nýr samningur:

„Það gildir það sama og um aðra leikmenn sem eru með samning sem er að renna út. Við metum þetta allt til enda. Það hefði á vissan hátt verið auðveldara ef að samningur Kolbeins við okkur væri lengri. Þá væri auðveldara að segja til um hvernig við ættum að hafa framhaldið. Nú verður þetta sérstök staða bæði fyrir hann og okkur,“ sagði Farnerud.

Uppfært: Sænskur umboðsmaður Kolbeins, Fredrik Risp, segir í bréfi til Vísis að Kolbeini hafi aldrei verið bannað að æfa með Gautaborg. Honum sé meira en velkomið að æfa með liðinu. Hann þurfi hins vegar að sinna sinni endurhæfingu og muni ekki spila meira með Gautaborg á þessu ári.