Stofutónleikar Superserious hjá góðum grönnum á Granda

Hljómsveitin Superserious mun nú stíga á stokk en þegar hafa hljómsveitin Flott, Teitur Magnússon og söngkonan RAVEN spilað á slíkum tónleikum. Stofutónleikarnir eru sýndir vikulega hér á Vísi og eru þetta fjórðu tónleikarnir í þessari röð. 

Tónleikarnir voru teknir upp að viðstöddum nokkrum gestum og eru ýmist rafmagnaðir eða órafmagnaðir. 

Hljómsveitin Superserious kemur úr Garðabæ og var stofnuð á þessu ári. Bandið varð til úr leifum hljómsveitarinnar Hide Your Kids eftir að meðlimir þess höfðu allir búið í sínu hvoru landinu í nokkur ár. Superserious sigraði tónlistarkeppnina Sykurmolann 2021 og er á mála hjá Alda Music. 

Daníel Jón Jónsson er lagahöfundur sveitarinnar ásamt því að hann syngur og spilar á gítar. Haukur Jóhannesson spilar á gítar og Kristinn Þór Óskarsson spilar á bassa ásamt því að taka upp. Helgi Einarsson trommar og Ingeborrg Andersen skrifar textann og syngur bakraddir. Arnar Guðjónsson sér um eftirvinnslu tónlistarinnar og Addi 800 masterar. 

Lögin Let's consume, Let's be grown ups og Let's hurt komu út fyrr á þessu ári við góða undirtekt. Öll lögin lifðu góðu lífi á vinsældarlistum X977, Rásar 2 og K100. 

Superserious gaf nýlega út sína fyrstu plötu sem ber heitið Let’s get serious og stefnir sveitin á nýtt efni snemma árs 2022.