Ellefu ára skáksnillingur bjargaði fjölskyldunni sinni af götunni

Skákhæfilegar stráksins hafa gjörbreytt lífi fjölskyldu hans sem var á götunni þegar hún kom til Bandaríkjanna frá Nígeríu.

CNN Sport sagði frá þessari ótrúlegu sögu Tani og hvernig hann bjargaði fjölskyldunni sinni úr hörmulegum aðstæðum.

Tani ætlar sér að verða yngsti stórmeistari skáksögunnar en hann þarf þá að ná þeim titli áður en hann verður tólf ára. Metið á Abhimanyu Mishra sem var tólf ára þegar hann fékk stórmeistaratitilinn.

Tani er sá 28. yngsti sem nær því að verða alþjóðlegur meistari en vill verða alþjóðlegur stórmeistari sem fyrst.

Stærsti sigur hans hingað til er á fylkismóti New York árið 2019 en það var kannski ekki spilamennskan sem gerir það að verkum heldur miklu frekar hvað sigur hans þar breytti lífi fjölskyldunnar.

Fjölskyldan flúði Nígeríu í júní 2017 af ótta við árásir öfgahópsins Boko Haram. Tani Adewumi byrjaði að tefla fyrir alvöru eftir að hann kom til Bandaríkjanna. Þá bjó fjölskyldan í skýli fyrir heimilislausa á Manhattan.

Tani fékk að ganga í skákklúbb P.S. 116 skólans í New York en gat það aðeins af því að skólayfirvöld felldu niður skráningargjaldið. Eftir að hann vann fylkismótið fékk fjölskyldan stuðning alls staðar af.

„Ein fjölskylda borgaði fyrir okkur eins árs leigu á Manhattan, ein fjölskylda gaf okkur nýjan 2019 Honda bíl og skákklúbburinn í Saint Louis bauð fjölskyldunni og þjálfurunum í heimsókn til Missouri,“ sagði Kayode Adewumi, faðir Tani sem starfar nú sem fasteignasali.

„Fullt af fólki hjálpaði okkur og margir veittu okkur fjárhagsstuðning eða peninga. Þeir gáfu peninga svo við kæmust í burtu úr athvarfinu fyrir heimilislausa,“ sagði Kayode.

Fjölskyldan setti upp GoFundMe síðu og þegar peningarnir fóru að streyma þangað inn ákvað hún að stofna Tanitoluwa Adewumi Foundation sem vinnur markvisst af því að styðja við bakið á bágstöddum börnum út um allan heim.

„Við þurfum að gefa til baka til þeirra sem þurfa svo á því að halda. Við vitum hvað þarf til enda höfum við upplifað þetta allt. Það er fólk sem var með okkur í athvarfinu sem er ennþá þar,“ sagði Kayode.

Fjölskyldan ætlar líka að láta til sín taka við að auka áhuga og aðstöðu fyrir fólk að stunda skákíþróttina í Afríku. Það er því kannski von á fleiri afrískum skáksnillingum í framtíðinni.

Á meðan stundar Tani æfingar af kappi því markmið hans eru áfram stórtæk og hver veit nema að hann komist í heimsmetabókina á næsta ári.

Það má lesa meira um þetta hér.