Tvær skriður féllu í nótt sunnan við bæinn Geirbjarnarstaði í Útkinn sem fóru yfir veginn.
Á vef Veðurstofunnar segir að skriðurnar hafi komið í ljós þegar þurfti að koma bændum að bæjum til að sinna skepnum.
„Spáð er úrkomulitlu veðri fram yfir hádegi en svo snýst í N-átt með vætu seinnipartinn.
Enn er rýming í gildi á svæðinu en staðan verður endurmetin með Almannavörnum síðar í dag,“ segir í tilkynningunni.
Í nótt voru fimm bæir rýmdir í Þingeyjarsveit og bærinn Nípá í Útkinn var rýmdur í dag vegna aurskriðna. Gríðarleg úrkoma hefur verið á svæðinu frá því í gær og mikið vatn er í fjallshlíðum. Þyrla Landhelgisgæslunnar myndaði svæðið í dag.
