Skjálftahrina við Keili síðastliðinn sólarhring með rætur skammt frá gígnum

„Það hefur verið dálítil virkni þarna rétt fyrir gos og hefur verið síðustu mánuði en þetta er vissulega smá hrina sem kemur aukalega,“ segir Hulda Rós Helgadóttir, náttúruvársérfræðingur hjá Veðurstofu Íslands.

Skjálftarnir hafa flestir verið á um sex til átta kílómetra dýpi. Hulda segir að þeir tveir stærstu hafi annars vegar mælst rétt fyrir klukkan ellefu í gærkvöldi og hins vegar rétt fyrir sjö í morgun.

„Þetta byrjaði seinnipartinn í gær og var í nótt og í morgun og svo hefur þetta róast aðeins svo það er svosem ekki mikið að frétta af þessu svæði núna.“

Ekki sé hægt að útiloka að kvika sé þarna að brjóta sér leið á nýjum stað en umræddir skjálftar eiga rætur um fimm til sjö kílómetra frá gígnum í Geldingadölum.

Hulda segir að engin gögn bendi þó til þess að einhver þensla sé í gangi á svæðinu. Of snemmt sé að segja til um hvaða þróun sé að eiga sér stað.