Mesta áskorunin að fá þekkta einstaklinga til að tala um kynlíf

„Einn sagðist hafa setið með sjötugri móður sinni, horft og rætt um kynlíf og svo barst ein saga af eldir borgurum sem voru að ræða þáttinn sín á milli og vildu meiri umfjöllun um sinn aldurshóp. Það er dásamlegt að heyra að svona ólíkar kynslóðir séu að tengja og horfa saman.“

Mættu til að „hössla“ konur

Í þáttunum Allskonar kynlíf fjalla Sigga Dögg og Ahd Tamimi um, líkt og nafnið gefur til kynna, alls konar kynlíf. Sex þættir eru í þessari fyrstu seríu, sem framleidd er af Freyja Filmwork.

„Þættirnir eru mjög léttir og skemmtilegir en um leið fræðandi og munu eflaust vekja upp umræður á flestum heimilum,“ segir Dögg í samtali við Vísi.

„Við Þórey Mjallhvít, leikstjóri og framleiðandi vorum búnar að ákveða að fara á nokkrar sjónvarpsstöðvar með fimm verkefni en vorum ekki komin með öll og ákváðum að fara á kvennakvöld hjá Rithöfundasambandinu, með það á bak við eyrað að „hössla“ konur til að gera þætti með okkur. Þar var Sigga Dögg, sem ég þekkti lítillega í gegnum sameiginlega vini. Ég lokkaði hana til okkar og hún var auðvitað löngu búin að pæla í að gera svona þætti og var meira en til, þannig að áhuginn var gagnkvæmur. Stöð 2 valdi svo þetta verkefni af þessum fimm.“

Þurfum á gleðinni að halda

Dögg hafði fyrir þetta aldrei unnið með Siggu Dögg áður. „Það er frábært að vinna með henni, hún er eldklár, virkar mjög vel fyrir framan myndavélarnar, þarf yfirleit ekki nema eina töku til að negla það sem hún á að gera og svo gaf hún sig alla í verkefnið. Svo unnu hún og Ahd svo fallega saman. Þau eru algjörar hetjur í mínum augum, berskjölduðu sig algjörlega svo að okkur hinum geti liðið betur í eigin skinni,“ segir Dögg.

„Þetta verkefni er skemmtilegasta verkefni sem ég hef unnið, það má segja að þættirnir hafi bjargað geðheilsunni minni á þessum Covid tímum. Það var svo mikil gleði og mikið hlegið í tökum, mér fannst alltaf eins og ég væri að koma af sólarströnd í lok dags þegar ég áttaði mig á því að út fyrir okkar búbblu geisaði heimsfaraldur og síendurteknir stormar. Ég vona að gleðin skili sér til fólks, ég held við þurfum öll á henni að halda.“

Freyja Filmwork er kvennarekið fyrirtæki og fyrir utan Ahd meðstjórnanda Siggu Daggar, var enginn karlmaður á tökustað þáttanna.

„Við erum með stefnu þar sem við reynum að finna konur í sem flest hlutverk fyrir framan og aftan myndavélarnar til að vega á móti kynjahallanum í faginu og skapa eftirspurn eftir öðrum kynjum og kynhneigðum en gagnkynhneigðum hvítum karlmönnum. Við vorum þess vegna með hundrað prósent kvennatökuteymi og svo kom Ahd til liðs við Siggu Dögg sem kom með alveg nýja sýn á hlutina frá sjónarhóli samkynhneigðs karlmanns sem er Íslendingur af erlendum uppruna.“

Þurftu að endurorða tilboðið

Tökurnar gengu eins og smurð vél, allt á áætlun og ekkert vesen.

„Það skemmtilegasta voru allar samræðurnar sem við sem tökuteymið, Sigga og Ahd áttum um kynlíf og svo heima við kvöldverðarboðið við aðra fjölskyldumeðlimi. Mesta áskorunin var að fá þekkta einstaklinga til að koma í þáttinn og tala um kynlíf, margir misskildu okkur og héldu að við værum að biðja þá um að tala um sitt persónulega kynlíf svo að við þurftum aðeins að endurorða tilboðið og þá gekk betur að fá fólk til liðs við okkur. Svo var auðvitað allt í blússandi Covid en við náðum að aðlaga okkur fljótt að þeim aðstæðum.“

Dögg er með mörg spennandi verkefni í gangi og er spennt fyrir haustinu.

„Við erum nú að leggja drög að seríu tvö af Allskonar kynlíf, þar sem okkur langar að fara með efnið enn dýpra og gera meira úr því. Ég er svo með stóra leikna þáttaröð sem ég er búin að vera að þróa í tíu ár og er að vona að fari að líta dagsins ljós. Svo er heimildarmyndin mín Aftur heim? á Vodafone leigunni. Hún fjallar um heimafæðingar, þannig að kynlíf og fæðingar hafa átt hug minn allan undanfarin ár.“

Annar þáttur af Allskonar kynlíf er á dagskrá Stöðvar 2 í kvöld en fyrsta þáttinn er hægt að horfa á inni á Stöð 2 + efnisveitunni.