Tekjur Íslendinga: Tekjuhæsti listamaður landsins er klippari

Árni Sæberg skrifar 18. ágúst 2021 11:30

Elísabet Ólafía Ronaldsdóttir hefur gert það gott í Hollywood undanfarin ár. Tara Ziemba/Getty Images

Elísabet Ólafía Ronaldsdóttir klippari var með rúmlega sex milljónir króna í mánaðartekjur árið 2020 samkvæmt tekjublaði Frjálsar Verslunar sem kom út í dag.

Elísabet Ólafía hefur um árabil getið sér gott orð sem kvikmyndaklippari, bæði hér á landi sem og erlendis. Hún hefur til að mynda klippt stórmyndir á borð við Deadpool 2, John Wick og Contraband. Árið 2021 koma út myndirnar Kate og Shang-Chi and the Legend of the Ten Rings sem klipptar eru af Elísabetu.

Í öðru sæti á lista yfir tekjuhæstu listamenn landsins er Óskar Magnússon rithöfundur og bóndi en hann þénaði rúmlega fjórar og hálfa milljón króna á síðasta ári. Óskar er einn eigenda Þórsmarkar ehf. sem gefur út Morgunblaðið.

Þriðja sætið á listanum vermir Tolli Morthens myndlistarmaður með mánaðartekjur upp á þrjár milljónir króna.

Í fjórða sæti er rithöfundurinn og lögfræðingurinn Ragnar Jónasson en hann þénaði rúmlega tvær milljónir króna á mánuði. Bækur Ragnars eru gefnar út um allan heim og hafa selst vel. Ragnar starfar á fjárfestingarsviði Arion banka samhliða ritstörfum.

Kvikmyndagerðarmaðurinn Steinþór Birgisson er fimmti tekjuhæsti listamaður ársins 2020 með tekjur upp á 1,8 milljón króna á mánuði.

Tekjuhæstu listamenn landsins árið 2020

Elísabet Ólafía Ronaldsdóttir, kvikmyndagerðarmaður 6.242 þúsund
Óskar Magnússon, rithöfundur og bóndi 4.648 þúsund
Tolli Morthens, listamaður 3.028 þúsund
Ragnar Jónasson, rithöfundur og lögfræðingur 2.171 þúsund
Steinþór Birgisson, kvikmyndagerðarmaður 1.783 þúsund
Baltasar Kormákur Baltarsson, leikstjóri 1.524 þúsund
Sigurjón Birgir Sigurðsson (Sjón), rithöfundur 1.495 þúsund
Margrét Einarsdóttir, búningahönnuður 1.390 þúsund
Stefán Sigurður Stefánsson, tónlistarmaður 1.374 þúsund
Steinunn Birna Ragnarsdóttir, óperustjóri 1.347 þúsund

Tekjublað Frjálsrar verslunar kom út í dag en rétt er að árétta að um er að ræða útsvarsskyldar tekjur á árinu 2020 og þurfa þær ekki að endurspegla föst laun viðkomandi. Munurinn getur falist í launum fyrir setu í nefndum og önnur aukastörf og hlunnindi vegna kaupréttarsamninga. Í launum sumra kann að vera falinn bónus vegna ársins 2019 sem var greiddur árið 2020.

Miðað er við útsvarsstofn samkvæmt álagningarskrá en í tölunum eru ekki fjármagnstekjur, til dæmis af vöxtum, arði eða sölu hlutabréfa. Sleppt er skattfrjálsum dagpeningum, bílastyrkjum og greiðslum í lífeyrissjóði. Þá ber að hafa í huga að inn í tekjunum geta líka verið einskiptisgreiðslur vegna úttektar á séreignasparnaði hjá lífeyrissjóði.

Bíó og sjónvarp Myndlist Tekjur