Sam­fé­lagið hefur ekki efni á að 2020 endur­taki sig

Kári Stefánsson talaði fyrir því í vikunni að ef alvarleg veikindi yrðu fátíð þrátt fyrir að smitbylgjan risi hátt, væri órökrétt að grípa til umfangsmikilla sóttvarnaraðgerða. 

Halldór Benjamín Þorbergsson, framkvæmdastjóri Samtaka atvinnulífsins, kveðst taka heils hugar undir sjónarmið Kára. Halldór telur að aðgerðir sem stjórnvöld gripu til fyrir skemmstu hafi verið skynsamlegar, en að eðlilegt sé að fólk sé að spyrja sig hvert markmið aðgerðanna sé.

„13. ágúst þurfa stjórnvöld að koma fram með trúverðuga langtímastefnu í þessum málum og það er ekki bara íslenskt atvinnulíf sem kallar eftir því, heldur allur þorri manna hér á landi,“ segir Halldór Benjamín.

Misvel hafi gengið í atvinnulífinu, mikið bakslag hafi orðið í ákveðnum greinum en öðrum síður.

„Hins vegar liggur alveg fyrir að ef við förum aftur í það ástand sem við sáum hérna fyrir 12-18 mánuðum hefur samfélagið sem slíkt ekki efni á því, hvorki atvinnulíf né ríki eða sveitarfélög,“ segir Halldór.

Óháð þeirri bið sem nú stendur yfir, telur Kári Stefánsson að við megum engan tíma missa í bólusetningum.

Þegar hefur verið ákveðið að bæta við sprautu hjá þeim sem fengu Janssen en Kári vill einnig að ráðist verði í að bólusetja alveg þau 20% sem enn eru almennt óbólusett, að hugleitt verði alvarlega að bólusetja börnin og að bætt verði við þriðja skammti hjá eldra fólki sem fékk tvo skammta af Pfizer eða sambærilegu.

Halldór vill ekki leggja mat á þessi atriði að öðru leyti en að hvetja þá sem eiga það eftir til að þiggja bólusetningu.

„Það er allra hagur og ég hlýt að leggja ofurkapp á það,“ segir Halldór.