Fundu gosfara í svartaþoku eftir tveggja tíma leit

Báðir voru heilir á húfi, samkvæmt tilkynningu frá Landsbjörg.

Lögreglan á Suðurnesjum minnir á að lífshættulegt er að stíga út á hraunið og þangað eigi aldrei að fara.

Tilkynninguna í heild má sjá að neðan.

Leið B er opin, hún er lengri (3-4 klst. fram og til baka) og nokkuð erfiðari en leið A með brattari brekku. Hún liggur að gígnum en þar er lítið að sjá eins og er þar sem lítil virkni er í gígnum og frá þessari hlið sést einungis á bakhlið gígsins.

Einnig er hægt að ganga inn Nátthaga að hraunflæðinu (leið C). Það er stutt og auðveld leið (1 klst. fram og til baka).

Frá Nátthaga má ganga áfram upp á Langahrygg og fá yfirsýn yfir gíg og gosvirkni síðustu mánaða. (1-2 klst. í viðbót)

Gossvæðið er hættulegt og þá ekki síst vegna lélegra loftgæða. Lögregla getur án fyrirvara lokað fyrir alla umferð inn að gosstöðvunum.

Förum ekki með börn (6 ára og yngri) að gosstöðvunum ef hætta er á gasmengun. Ekki er ráðlegt að börn dvelji lengur en 15 mínútur á stað þar sem loftmengun er yfir heilsuverndarmörkum. Leitum upplýsinga um loftgæði á svæðinu áður en gengið er af stað.

Spá veðurvaktar um veður og gasdreifngu í dag og á morgun:

Suðvestlæg átt 5-13 m/s. Gasmengun berst einkum til norðausturs og gæti orðið vart við hana á höfuðborgarsvæðinu. Suðaustan 10-18 m/s og rigning á morgun og gasmengunin mun fara til norðvesturs. Hægari og suðlægari átt annað kvöld.

Bílastæði:

Bannað er að leggja ökutækjum á og við Suðurstrandarveg. Leggja skal bílum á skipulögðum stæðum á grasflötum við veginn en aðkoma að bílastæðum er bæði úr austri og vestri.

Gönguleiðir:

Gönguleiðir A og B eru stikaðar en B leiðin er sýnu erfiðust og lengst og hefur reynst mörgum erfið. Leið C er stutt og auðveld leið.

Nauðsynlegt er að vera í góðum gönguskóm og öðrum útivistarfatnaði.

Á safetravel.is eru upplýsingar um stöðuna hverju sinni uppfærðar reglulega yfir daginn. Vakin er athygli á gönguleið að útsýnisstað hefur verið breytt vegna hraunflæðis.

Loftmengun:

Yfirborðsmengun getur verið í jarðvegi, snjó og yfirborðsvatni vegna þungmálma og uppsöfnunar flúors (F). Mengun er mest í næsta nágrenni við gosstöðina. Vegna loftmengunar er ekki ráðlagt að dvelja lengi við gosstöðvarnar. Börnum, öldruðum, barnshafandi konum og þeim sem hafa undirliggjandi hjarta- og lungnasjúkdóma er ráðlagt frá því að fara á gosstöðvarnar ef einhver loftmengun er yfirvofandi.

Áætlun viðbragðsaðila sem gæti breyst án fyrirvara:

• Frá miðnætti og fram eftir degi eru engir viðbragðsaðilar á svæðinu til að mæla gasmengun og bregðast við óhöppum.

• Gossvæðið er hættulegt og þá ekki síst vegna lélegra loftgæða. Lögregla getur án fyrirvara lokað fyrir alla umferð inn að gosstöðvunum.

• Búast má við gasmengun vegna eldgoss á Reykjanesi og er fólk hvatt til að fylgjast með loftgæðamælingum á loftgaedi.is og leiðbeiningum frá Almannavörnum.

• Gasmengun við gosstöðvarnar getur alltaf farið yfir hættumörk, mökkurinn leggst undan vindi og því öruggast að horfa til eldstöðva með vindinn í bakið.

• Í hægviðri (<5 m/s) getur gas safnast fyrir, þá stjórnast vindafar af landslagi og gas getur verið yfir hættumörkum langt upp í hlíðar. Í slíkum tilfellum þurfa áhorfendur að færa sig upp á fjöll og hryggi.

• Velja þarf gönguleið eftir vindaspá hverju sinni.

• Forðast skal að taka hunda með sér að gosstöðvunum. Hundar eru útsettari fyrir mengun vegna gass þar sem þeir eru nær jörðu. Einnig getur flúor leynst í pollum sem hundar drekka úr.