Grealish líklega á leið til City fyrir hundrað milljónir punda

Enskir fjölmiðlar greina frá því að City muni borga um hundrað milljónir punda fyrir Grealish sem myndi gera hann að dýrasta leikmanni í sögu ensku úrvalsdeildarinnar.

Villa vill eðlilega ekki missa fyrirliðann sinn og hefur boðið honum nýjan og betri samning. Líklegra en ekki er þó að hann yfirgefi uppeldisfélagið og gangi til liðs við Englandsmeistarana eftir EM.

City-menn eru stórhuga og vilja einnig fá Harry Kane, fyrirliða enska landsliðsins, frá Tottenham.

Grealish var í byrjunarliði Englands gegn Tékklandi í lokaumferð riðlakeppninnar á EM á þriðjudaginn og lagði upp eina mark leiksins.