Spenntar fyrir sprautunni þótt þær séu með þeim síðustu í röðinni

Allir forgangshópar hafa nú verið boðaðir í bólusetningu. Þúsundir fylgdust með í beinni útsendingu á Vísi í morgun þegar restinni, fimmtíu og fjórum hópum, var raðað niður. Röðina má nálgast í fréttinni hér fyrir neðan.

Hópunum er skipt jafnt niður á næstu þrjár vikur og fyrstu hóparnir hafa þegar verið boðaðir í bólusetningu í byrjun næstu viku. Gangi áætlanir eftir verða síðustu hóparnir búnir að fá sprautu 25. júní.

En hvernig tóku landsmenn í bólusetningarlottóið í dag? Ljóst er að fólk sat mislímt við skjáinn.

„Ég missti af því,“ sagði Íris Hrund Stefánsdóttir hársnyrtir þegar fréttastofa náði tali af henni í Kringlunni í dag. 

Ætlarðu að fara þegar þú færð boð? „Já, klárlega. Við fyrsta tækifæri.“

Drátturinn „sirkus“

Og skiptar skoðanir voru á drættinum.

„Af hverju ekki að vera með einhverja áætlun, plan? Og vinna sig í gegnum það. Mér finnst þetta eiginlega sirkus, orðið,“ sagði Jökull Veigarsson, háskólanemi.

Allir hugðust þó þiggja sprautuna.

„Ég væri alveg til í að komast að fyrr en maður verður bara að þakka fyrir þetta allavega að fá í júní,“ sagði Karlotta Guðjónsdóttir flugmaður sem fædd er 1990 og verður því, ef allt gengur að óskum, bólusett í þriðju vikunni.

Ertu spennt fyrir því að mæta í bólusetningu?

„Já, sannarlega. Það er mikið af ferðalögum framundan þannig að það verður gott að komast að.“

Mjög spennt að mæta

Birgitta Birgisdóttir starfsmaður Keiluhallarinnar er fædd árið 1994 og var því einnig dregin í þessari lokaviku handahófsbólusetninga.

„Ég er síðust, já.“ 

Og hvað finnst þér um það? 

„Mér finnst það bara allt í lagi.“ 

Og ætlarðu að mæta þegar þú færð boðið?

„Já, ég er mjög spennt að mæta.“

Yfir hundrað þúsund manns eru nú fullbólusettir á landinu, eða 34 prósent íbúa sextán ára og eldri, samkvæmt tölum á Covid.is. 63,5 prósent hafa fengið að minnsta kosti eina sprautu. Fáist nógu mikið bóluefni gætu því að minnsta kosti 82 prósent hafa fengið fyrri sprautuna eftir þrjár vikur.