Stefnir í einn af betri dögum það sem af er ári

Eftir kuldatíð undanfarnar vikur má sjá að hitatölur eru á uppleið í veðurspám fyrir vikuna. Hlýr loftmassi mun færast yfir landið á miðvikudag og verða hitatölurnar hærri en við höfum séð síðust vikur.

Óli Þór Árnason, veðurfræðingur á Veðurstofu Íslands, segir í samtali við Vísi að það stefni í að miðvikudagurinn geti orðið einn af betri dögum það sem af er ári þegar kemur að veðri.

Búast má við fremur hægri austlægri átt en léttskýjuðu nánast um allt land. Hiti getur náð frá fimm stigum austast á landinu en upp í fimmtán stig á Vesturlandi.