Inga Lind deilir hart á Njál Trausta

Njáll Trausti skrifaði lofsamlega grein um fiskeldi í Markaðinn í síðustu viku, einkum með áherslu á Austfirði. Njáll stendur þessa dagana í baráttu um efsta sæti á framboðslista Sjálfstæðisflokksins í Norðausturkjördæmi, en Inga Lind er stjórnarmaður í Íslenska náttúruverndarsjóðnum. 

Inga Lind er líka mikill veiðimaður.

Grein Njáls Trausta hljómar að sögn Ingu Lindar eins og hún hafi verið skrifuð á skrifstofu Fiskeldis Austfjarða „svo laus voru skrifin við gagnrýni og fyrirvara um laxeldi í opnum sjókvíum.“ Sannleikurinn sé sá að slík starfsemi flokkist sem mengandi iðnaður, þar sem spurningin sé ekki hvort hún valdi skaða á lífríkinu heldur einfaldlega hversu miklum.

Inga heldur því fram að sjókvíaeldisfyrirtæki hafi aldrei greitt krónu í tekjuskatt á Íslandi. „Hamagangurinn við að þrýsta í gegn nýjum leyfum fyrir sjókvíaeldi í íslenskum fjörðum snýst þannig um skammtímagróða fárra en ekki langtímahagsmuni margra,“ skrifar Inga Lind í grein á Vísi.

Segir umhverfisvitund eldisfyrirtækja sterka

Njáll Trausti telur ekki ástæðu til að hafa áhyggjur af aðkomu erlendra fiskeldisfyrirtækja að starfsemi hér á landi. „Innan eldisfyrirtækja er sterk umhverfisvitund enda sjálfra þeirra hagsmunir að ganga vel um náttúruna. Kröfur alþjóðlegra umhverfisvottana aga einnig starfsemina,“ skrifar Njáll.

Fyrirtækin miðli íslensku eldi mikilli reynslu og þekkingu og íslenskir fjárfestar séu þá farnir að fjárfesta í greininni. „Óháð eignaraðild er fiskeldið að skilja mikið eftir sig í hinum dreifðu byggðum. Efnahagsleg hagsæld mun áfram byggja á vexti útflutningsgreina. Þar verður fiskeldið æ mikilvægari drif kraftur atvinnusköpunar og byggðafestu, ekki síst á Austfjörðum,“ skrifar þingmaðurinn.

Inga Lind víkur að þessari fjárhagslegu hlið í sinni grein. Hún segir að störfunum fækki jafnt og þétt sem hlutfall af framleiðslumagni í sjókvíaeldi. Að auki sé heimafólk almennt ekki áhugasamt um störf í þessari grein og flestir starfsmennirnir erlent farandverkafólk.

Sjókvíaeldi er að sögn Ingu bein atlaga að verðmætum sem þegar eru til í landinu, enda séu tekjur af veiðihlunnindum á meðal meginstoða búsetu í dreifbýli hér á landi.

„Þegar horft til landsins alls standa þessar tekjur undir 28 prósent af hagnaði og launakostnaði í landbúnaði. Í kjördæmi Njáls er þetta hlutfall vel yfir landsmeðaltalinu eða 34% á Austurlandi,“ skrifar Inga.

Prófkjör fyrir val á lista Sjálfstæðisflokksins í Norðausturkjördæmi fyrir alþingiskosningar 2021 fer fram laugardaginn 29. maí. Framboðsfrestur er runninn út.