Getur ekki lengur vaknað í rólegheitum á morgnana

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég er vön að vakna klukkan sjö á morgnana en nú er nýjasti fjölskyldumeðlimurinn, tíu vikna Bichon tík, aðeins að trufla þá rútínu.

Hún er alveg til í að við á heimilinu förum fyrr á fætur til að leika við sig og þá helst um klukkan sex!

En hún er svo hamingjusöm með hvern nýjan dag og glöð að henni er auðveldlega fyrirgefið þó að markmiðið sé að hún sofi til sjö einn daginn.“

Hvað er það fyrsta sem þú gerir á morgnana?

Ég var vön að vakna í rólegheitunum og liggja undir sæng í um tíu mínútur áður en ég fór á fætur og vakti dætur okkar. 

En þessa vikurnar rýk ég á fætur og hleypi hvolpinum út til að pissa áður en hún vekur heimasæturnar með pompi og prakt.

Ég byrja svo alla daga á að kveikja á morgunútvarpinu, fá mér vatnsglas og lýsi áður en ég fæ mér svo morgunmat sem nánast alltaf er hrein AB mjólk með múslí og bláberjum.

Við fjölskyldan eigum annars oftast stund saman á morgnana, borðum saman morgunmatinn, græjum nesti og spjöllum um daginn sem framundan er.

Þegar dæturnar svo rjúka út í skólann fæ ég mér góðan kaffibolla eða tvo, skoða fréttamiðla og byrja að skoða tölvupóstana.“

Ertu byrjuð að skipuleggja eitthvað skemmtilegt fyrir sumarið?

„Við fjölskyldan erum orðin mjög spennt fyrir sumrinu og ætlum að ferðast mikið innanlands. Við höfum ferðast mikið um Ísland síðastliðin ár og viljum helst hvergi annars staðar vera á sumrin enda einstakt land sem við eigum.

Ég á mér marga uppáhaldsstaði en mér finnst samt alltaf jafnmagnað að á hverju sumri finnst mér við uppgötva eitthvað nýtt til að skoða enda náttúra Íslands stórfengleg.

Við fjölskyldan erum ágætlega aktív og dugleg að taka skyndiákvarðanir. Það eru þó alla vega tvær útilegur planaðar, en við eltum alltaf veðrið í stað þess að ákveða fyrirfram hvert verður farið.

Þá förum við í nokkrar hestaferðir sem er ein skemmtilegasta leiðin til að skoða landið í góðra vinahóp. Það er einnig ein veiði á dagskrá og við hjónin spilum líka golf saman.“

Í hvaða verkefni ertu að vinna helst í þessa dagana?

Það hefur verið mikill vöxtur í iðn- og tæknifræðideild frá því hún var stofnuð fyrir tveimur árum og er nú deildin fjórða stærsta deild Háskólans í Reykjavík. Það eru því fjölmörg verkefni sem ég þarf að sinna á hverjum degi og frá mörgu áhugaverðu að segja.

Þessa dagana erum við að rýna tæknifræði námið okkar með það að leiðarljósi að gera það verkefnamiðaðra og til að nemendur verði enn hæfari til að takast á við áskoranir framtíðarinnar á vinnumarkaði.

Mikill hraði breytinga í samfélaginu krefst meira framboðs fólks með sérhæfða tæknimenntun en því miður er þó staðan sú í dag að við náum ekki að anna eftirspurn atvinnulífsins eftir tæknifræðingum. Það eru allir af þeim sem eru að útskrifast í vor komnir í vinnu utan tveir og oft er það þannig að nemendur eru komnir með vinnu löngu áður en þeir útskrifast.

Það sem einkennir námið er að skipulag og uppbygging námsins byggir á nánum tengslum við atvinnulífið og áherslan á að hugvit og verkvit mætist. Tæknifræði hentar þannig vel þeim einstaklingum sem vilja hagnýta tæknimenntun sem býður upp á mikla möguleika, bæði í atvinnulífinu og í framhaldsnámi, til dæmis master í verkfræði, en hægt er að læra bygginga, rafmagns og vél- og orkutæknifræði. Þá höfum við nýlega stofnað fagráð með aðilum úr atvinnulífinu til að tryggja enn betur að námið svari þörfum atvinnulífsins og að fyrirtæki fái til sín útskrifaða nemendur með þá þekkingu sem krafist er í nútíma starfsumhverfi.

Við erum í stöðugu samtali við atvinnulífið og eftir slík samtöl og ýtarlegar þarfagreiningar hófst kennsla við tvær nýjar námsbrautir hjá okkur, upplýsingatækni í mannvirkjagerð (BIM) og rekstrarfræði síðasta haust. Upplýsingalíkön mannvirkja (BIM – Building Information Model) gera aðilum í byggingariðnaði mögulegt að nýta möguleika upplýsingatækni á sviði hönnunar, framkvæmda og reksturs, með úrbætur og gæði að leiðarljósi. Námið hentar því þeim sem vilja sérhæfa sig í þeim stafrænu umbreytingum sem nú eiga sér stað. Diplómanám í rekstrarfræði er stutt og hagnýtt rekstrar- og viðskiptanám, sérstaklega sniðið að einstaklingum á vinnumarkaði. Námið hentar vel þeim sem eru t.d. með meistarapróf í iðngrein, diplómanám iðnfræði eða með stúdentspróf og að hafa að lágmarki fimm ára reynslu af rekstri.“

Hvernig skipuleggur þú þig í vinnu?

„Ég held það sé óhætt að segja að ég sé mjög skipulögð í vinnu en dagarnir hjá mér eru margir þéttbókaðir af fundum svo það er því nauðsynlegt.

Ég nota minnisbók mikið og lista hjá mér bæði það sem þarf að gera og fleiri hugmyndir sem ég fæ eða gagnlegar upplýsingar.

Á mánudögum þá skipulegg ég alltaf helstu verkefni vikunnar sem ég punkta hjá mér í bókina og í upphafi hvers dags þá punkta ég niður lista yfir þau verkefni sem vinna þarf á viðkomandi degi.

Í teymisvinnu með öðrum notast ég við hugbúnað þar sem upplýsingaflæði og gagnsæi er mikilvægt.“

Hvenær ferðu að sofa á kvöldin? 

„Ég er oftast komin upp í rúm rétt fyrir eða í kringum miðnætti.“