Rúmlega 400 manns í sóttkví

Einn greindist með kórónuveiruna innanlands í gær. Hann var í sóttkví en alls eru 57 í einangrun með Covid-19.

1.064 eru í skimunarsóttkví og einn er á sjúkrahúsi. Þá er bólusetningu lokið hjá 16.906.

Enginn greindist með veiruna á landamærunum í gær. Nýgengi innanlandssmita er nú 3,3 og nýgengi landamærasmita 11,7.

Þá var mikill fjöldi einkennasýna tekin innanlands í gær eða 1.215. Í fyrri og seinni landamæraskimun voru tekin samtals 486 sýni og 323 sýni voru tekin í skimunum á vegum Íslenskrar erfðagreiningar.

Á sunnudag greindust fimm manns með kórónuveiruna innanlands. Af þeim voru þrír utan sóttkvíar.

Þórólfur Guðnason, sóttvarnalæknir, sagði í samtali við fréttastofu í morgun að næstu daga yrði fylgst með því hvort fólk utan sóttkvíar færi að greinast. Það myndi ráða því hvort gripið verður til hertari aðgerða innanlands.

Fréttin hefur verið uppfærð.