Brady og Mahomes í Super Bowl í kvöld: Eins og ungur LeBron að mæta Jordan

Það stefnir í sögulegt kvöld þegar Super Bowl leikurinn fer fram á Flórída. Tom Brady getur unnið sinn sjöunda NFL-titil í kvöld en um leið getur Patrick Mahomes orðið fyrsti leikstjórnandinn í sextán ár til að vinna tvö ár í röð.

Þeir Tom Brady og Patrick Mahomes eru fulltrúar tveggja kynslóða enda átján ár á milli þeirra. Tom Brady er enn að spila 43 ára gamall en á sama tíma er Mahomes orðinn besti leikmaður deildarinnar aðeins 25 ára gamall.

Patrick Mahomes þurfti í aðdraganda leiksins að svara spurningum um hvort hann ætlaði að ná Brady í titlasöfnuninni en Brady fullvissaði aftur á móti sýna spyrla að því að hann ætlaði jafnvel að spila lengur en tvö ár í viðbót.

Liðin koma af mismundandi forsendum inn í Super Bowl leikinn í gær. Kansas City Chiefs er ríkjandi meistari og vann fjórán af sextán leikjum sínum í deildarkeppninni. Annað af töpunum kom í lokaleiknum þegar ekkert var undir og Chiefs hvíldi lykilmenn eins og leikstjórnandann Patrick Mahomes, útherjann Tyreek Hill og innherjann Travis Kelce.

Það bjuggust því allir við því að sjá Kansas City Chiefs liðið í úrslitaleiknum enda búið að vinna 25 af síðustu 26 leikjum sínum með Patrick Mahomes.

Leið Tampa Bay Buccaneers í úrslitaleikinn var allt öðruvísi. Liðið var bara með fimmta best árangurinn í Þjóðardeildinni og þurfti að vinna þrjá útileiki sína á leiðinni í Super Bowl.

Buccaneers undir stjórn Tom Brady, fór hins vegar bæði á heimavöll New Orleans Saints og á heimavöll Green Bay Packers og vann tvo góða sigra. Brady hefur verið ótrúlega sigursæll á sínum ferli og er jafnan bestur þegar leikirnir eru stærstir.

Það er þykir mörgum spekingum aftur á móti mikil veisla að fá að sjá Tom Brady mæta Patrick Mahomes í Super Bowl.

Patrick Mahomes er besti leikmaður deildarinnar í dag og Tom Brady er besti leikstjórnandi allra tíma.

Það er kannski best að lýsa þessu eins og ungur LeBron James hefði fengið að mæta Michael Jordan í úrslitum NBA-deildarinnar á einu af síðustu árum Jordan með Bulls. Jordan er að flestum talinn vera besti leikmaður allra tíma en LeBron James hefur safnað saman ótrúlegum tölum á sínum ferli og endar langt fyrir ofan Jordan í nær öllum tölfræðiþáttum.

Við vorum mörgum árum frá því að fá slíkan leik milli MJ og LeBron en okkur er boðið í Brady-Mahomes veislu í kvöld. Þökk sé þrjósku og ótrúlegu formi Tom Brady þá neitar hann að gefa sig í baráttunni við tímaföðurinn.

Fyrir vikið verður enn glæsilegri ferill hans bara enn stórkostlegri og það er viðbót við ferilsskrána að fara 43 ára gamall, á fyrsta ári með nýtt lið, alla leið í Super Bowl. Það voru öflugir leikmenn í liði Tampa Bay Buccaneers en liðið var samt langt fá því að komast í úrslitakeppnina í fyrra hvað þá alla leið í úrslitaleikinn um titilinn.

Verkefni kvöldsins hjá Brady er að stopp lið sem hefur síðustu tvö ár litið út eins og ósigrandi lið. Kansas City Chiefs vann NFL titilinn í fyrra og getur nú orðið fyrsta liðið frá því í febrúar 2005 til að vinna deildina tvö ár í röð.

Kansas City Chiefs er spáð sigri þrátt fyrir að liðið sé að mæta sexföldum meistara í Tom Brady. Undanfarin tvö ár hefur engu liði tekist að stöðva Patrick Mahomes og félaga þegar eitthvað er undir í leikjum liðsins.

Patrick Mahomes er bara rétt að byrja og undanfarin ár hefur hann alltaf geta sett fótinn á bensíngjöfina þegar það hefur hert að liðinu í leikjunum.

Takist Tom Brady hins vegar að vinna Drew Brees, Aaron Rodgers og Patrick Mahomes á leið sinni að sjöunda Super Bowl hringnum sínum þá verður þetta tímabil eitt af þeim allra bestu á stórkostlegum ferli hans.

Það er eina sem er hægt að segja fyrir svona Brady-Mahomes veislu er: Góða skemmtun.