Samsung kynnti vélmenni sem taka úr vélinni og nöldra í þér

Samúel Karl Ólason skrifar 11. janúar 2021 19:33

Bot Care lærir á hegðun notenda sinna og lætur þá vita af því ef þeir eru ekki að haga sér vel. Samsung

Tæknirisinn Samsung kynnti nýjar tegundir vélmenna í dag sem ætlað er að aðstoða við rekstur heimila. Það gerði fyrir tækið á Consumer Electronic Show eða CES sem er með töluvert breyttu sniðið þetta árið.

Stærsta tæknisýning heims, þar sem helstu tæknifyrirtæki heimsins og nýgræðingar sýna vörur sínar og starfsemi, fer nú alfarið fram á netinu.

Vélmennin sem Samsung kynnti heita Bot Handy og Bot Care.

Bot Handy á að hjálpa til á heimilinu og á það til dæmis að geta tekið úr uppþvottavél, borið fram rauðvín, lagt á borð og gert ýmislegt annað. Samkvæmt Samsung mun vélmennið nota gervigreind og myndavél til að bera kennsl á muni, sjá hve þungir þeir eru, og hver hawrt má taka á þeim.

Bot Care á að vera nokkurs konar vélrænn aðstoðarmaður. Manns eigin R2-D2, bara mun verri. Vélmennið fylgist með þér og lærir á hegðun þína og bregst við henni. Það getur til að mynda nöldrað í þér þegar þú ert búinn að vera of lengi í tölvunni og minnt þig á að taka pásu. Það getur einnig tekið við símtölum.

Samkvæmt grein Engadget er alfarið óljóst hvenær þessi vélmenni verða til sölu.

Hér má sjá kynningu Samsung frá því í dag.

Samsung kynnti einnig nýtt ryksuguvélmenni sem virðist sérstaklega hannað með gæludýr í huga. Eigendur þess munu geta fylgst með dýrum sínum í gegnum vélmennið.