„United hefur fengið fleiri víti síðustu tvö ár en ég á fimm og hálfu ári“

Danny Ings kom Southampton yfir á 2. mínútu í leiknum í gær og þar við sat. Liverpool sótti stíft í seinni hálfleik en gekk illa að opna vörn heimamanna.

Liverpool gerði tilkall til vítaspyrnu þegar boltinn fór í hönd Jack Stephens í upphafi seinni hálfleiks og einnig þegar Sadio Mané féll í baráttu við Kyle Walker-Peters. Klopp var langt frá því að vera sáttur með meðferðina sem Mané fékk í leiknum.

„Þetta virtist vera klár vítaspyrna. Ég spurði fjórða dómarann og spurði hvort þetta yrði skoðað á myndbandi. Hann sagði að það væri búið og þetta væri ekki víti,“ sagði Klopp.

„Það sem Andre Marriner gerði við Sadio Mané í kvöld, ég er ekki viss um að það sé í lagi. Manchester United hefur fengið fleiri víti á síðustu tveimur árum en ég á fimm og hálfu ári. En við höfum engar afsakanir.“

Klopp hrósaði Southampton fyrir frammistöðu sína og sagði að Dýrlingarnir hefðu átt sigurinn skilið.

„Að sjálfsögðu höfum við áhyggjur. Við erum ekki kjánar. Við þurfum að svara fyrir okkur, hundrað prósent. Southampton verðskuldaði þetta. Þeir lögðu allt í leikinn,“ sagði Klopp.

Næsti leikur Liverpool er gegn Aston Villa í 3. umferð ensku bikarkeppninnar á föstudaginn. Þann 17. janúar mætir liðið svo United í toppslag í ensku úrvalsdeildinni.

„“