Af­mælis­fögnuði LungA frestað fram á næsta ár

Listahátíðinni LungA á Austurlandi sem átti að fara fram í júlí hefur verið aflýst vegna kórónuveirunnar.

Í tilkynningu segir að á erfiðum tímum þurfi að taka erfiðar ákvarðanir og hafi því verið ákveðið að fresta 20 ára afmælisfögnuði hátíðarinnar til 10. til 18. júlí 2021. Þetta þýðir að listasmiðjum og stórtónleikum LungA 2020 hefur verið aflýst.

„Ástæðan er einföld, við getum ekki borið ábyrgð á því að stefna jafn mörgum saman og vanalega sækja hátíðina heim. Þó Covid 19 hafi ekki enn komið upp á Seyðisfirði viljum við ekki hætta á slíkt með því að stefna saman stórum hópi í nafni listarinnar. Þar fyrir utan getum við hvorki boðið upp á gistingu né listasmiðjur svo að það sé fjárhagslega sjálfbært á meðan að 2 metra regluna nýtur við.

Við vitum auðvitað ekki að svo stöddu hvort fjöldatakmörkunum og 2 metra reglan verði enn í gildi um miðjan júlí, en við getum ekki haldið listamönnum og byrgjum í óvissu mikið lengur, auk þess sem að fjártapið yrði okkur endanlega að falli ef við þyrftum að aflýsa á síðustu stundu, nógu þungur er róðurinn.

Við munum þó reyna eftir fremsta megni að þjóna listinni og halda minni viðburði í júlí mánuði fyrir Seyðfirðinga og gesti bæjarins. Þar fyrir utan munum nýta okkur möguleikana sem að internetið býður uppá og erum að skipuleggja opið gallerí á veraldarvefnum. Auk þess munum við gefa út 20 ára afmælisbók LungA og afmælisvarning sem hægt verður að kaupa í væntanlegri vefverslun hátíðarinnar.

Þeir sem hafa nú þegar keypt miða á hátíðina geta fengið endurgreitt eða fært miðann yfir á næsta ár ef haft er samband við tix.is.

Eðli málsins samkvæmt er þetta gríðarlegt áfall fyrir okkur, enda mikil vinna og tilhlökkun að baki, en í ljósi aðstæðna bregðumst við þessari fordæmalausri stöðu og snúum aftur tvíelfd á næsta ári,“ segir í tilkynningunni.