Eiginkona ferðamannsins sem lést á Húsavík komin í einangrun

Eiginkona erlenda ferðamannsins sem lést á Húsavík í gær eftir alvarleg veikindi er komin í einangrun. Eiginmaður hennar reyndist smitaður af kórónuveirunni sem veldur sjúkdómnum COVID-19 og er eiginkonan einnig smituð af veirunni.

Þetta kom fram í máli Þórólfs Guðnasonar, sóttvarnalæknis, á upplýsingafundi vegna kórónuveirunnar sem hófst upp úr klukkan 14 í dag.

Þórólfur sagði að andlát mannsins hefði verið skyndilegt og hann hefði verið með einkenni sem báru brátt að.

Hins vegar var hann ekki með nein einkenni COVID-19 og því væri frekari rannsókna þörf á því hvort einhver tengsl væru á milli þess sjúkdóms og andlátsins.

„En það er fremur ólíklegt miðað við þau einkenni sem greint hefur verið frá,“ sagði Þórólfur.

Hjónin, sem eru frá Ástralíu, höfðu verið á ferðalagi saman hér á landi en smitrakning er nú í gangi varðandi það hvaða leið þau fóru um landið og í hvaða löndum þau voru í áður en þau komu hingað.

Þórólfur kvaðst aðspurður ekki hafa upplýsingar um hvort að maðurinn, sem var um fertugt, hafi verið með undirliggjandi sjúkdóma. Þá vildi hann ekki svara því hvaða einkenni maðurinn var með og sagðist ekki telja það viðeigandi.

Við upphaf upplýsingafundarins fór sóttvarnalæknir yfir nýjustu tölur varðandi smit hér á landi. Heildartala staðfestra smita er nú 220 og eru um 2100 manns í sóttkví. Fjórir eru innlagðir á sjúkrahúsi, þar af tveir á gjörgæslu en enginn í öndunarvél.

Fréttin hefur verið uppfærð.