Níu greindust innanlands í gær

147 eru nú í einangrun, samanborið við 142 í gær. Þá eru 232 nú í sóttkví en voru 246 í gær. 23 eru á sjúkrahúsi vegna Covid-19 en enginn á gjörgæslu, líkt og í gær.

Þá greindust sjö með veiruna á landamærum í gær. Fjórir reyndust með virkt smit en beðið er niðurstöðu mótefnamælingar í þremur tilvikum.

Fimm þeirra sem greindust innanlands í gær greindust við einkennasýnatöku Íslenskrar erfðagreiningar og Landspítala. Fjórir greindust í sóttkvíar- og handahófsskimun. 919 einkennasýni voru tekin í gær, 552 sýni í landamæraskimun og 32 sóttkvíar- og handahófssýni.

Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur, er nú 30,0, en var 28,9 í gær. Þá er nýgengi landamærasmita nú 18,5, en var 16,9 í gær.

Alls hafa 5.754 greinst með veiruna hér á landi frá upphafi faraldursins. Þá má rekja 29 dauðsföll til Covid-19 frá því að faraldurinn hófst. Síðast lést einstaklingur á áttræðisaldri á Landspítalanum í gær.

Fréttin hefur verið uppfærð.