Jólapavlovur með ferskum berjum

Hér fyrir neðan má finna uppskriftina að jólapavlovum.

Marensbotnarnir

• 6 eggjahvítur
• 300 g sykur
• 1 ½ tsk mataredik
• 1 tsk vanilludropar
• Salt á hnífsoddi

Aðferð:

1. Hitið ofninn í 100°C og ég stilli á blástur.
2. Þeytið eggjahvítur með salti, bætið sykri saman við í þremur skömmtum og þeytið vel á milli. Bætið ediki og vanilludropum saman við þegar marensinn er orðinn stífur.
3. Skiptið marensblöndunni niður í nokkur hreiður og það má líka búa til eina stóra köku. Fer bara eftir smekk hvers og eins.
4. Bakið kökurnar við 100°C í 90 mínútur. Slökkvið á ofninum, opnið hurðina og látið kökurnar kólna alveg og best ef þær fá að kólna í ofninum yfir nótt.

Toblerone rjómi

• 500 ml rjómi
• 1 tsk vanilludropar
• 1 msk flórsykur
• 100 g toblerone súkkulaðisósa. Uppskrift má finna hér að neðan + meiri til þess að skreyta kökurnar í lokin. Gott að gera tvöfalda uppskrift að súkkulaðisósunni!
• 60 g toblerone súkkulaði
• Fersk ber til skrauts

Aðferð:

1. Setjið súkkulaðisósu, mikilvægt að hún sé orðin köld og rjóma saman í hrærivél ásamt vanilludropum og flórsykri. Þeytið saman þar til súkkulaðirjóminn er orðinn stífþeyttur.
2. Saxið niður toblerone súkkulaðið og bætið út í rjómakremið.
3. Fyllið marengskökurnar með súkkulaðirjómanum og skreytið með ferskum berjum. Það er agalega gott að gera meira af súkkulaðisósunni og hella yfir kökurnar í lokin, það setur punktinn yfir i-ið.

Toblerone súkkulaðisósa

• 200 g Toblerone súkkulaði
• 2 – 3 msk rjómi

Aðferð:

1. Saxið niður súkkulaðið. Bræðið súkkulaði í rjóma við vægan hita, byrjið á því að setja 2 matskeiðar af rjóma og ef ykkur finnst sósan of þykk þá bætið þið meiri rjóma saman við.
2. Kælið alveg áður en þið notið sósuna í rjómakremið.