Tvö sjóðheit lið tryggðu sér farseðilinn í úrslitakeppni NFL

Meistarar Kansas City Chiefs eru á miklu skriði og með sætið í úrslitakeppninni tryggt eftir 22-16 sigur á Denver Broncos í nótt. Denver liðið var reyndar 16-12 yfir í lok þriðja leikhluta en Patrick Mahomes tryggði sínum mönnum svo gott sem sigurinn þegar hann fann innherjann Travis Kelce sem skoraði snertimark undir lokin.

Chiefs liðið hefur nú unnið sjö leiki í röð og alls 11 af 12 leikjum tímabilsins. Pittsburgh Steelers og New Orleans Saints eru einu liðin sem hafa unnið fleiri leiki í röð. Pittsburgh Steelers hefur unnið alla ellefu leiki sína en mætir Washington Football Team í kvöld.

New Orleans Saints liðið hefur spilað án leikstjórnandans Drew Brees í undanförnum leikjum en það hefur ekki hægt á liðinu. Taysom Hill tók við keflinu og liðið hefur unnið alla þrjá leikina síðan að Brees datt út vegna rifbeinsbrota.

Saints vann níunda leikinn í röð á móti Atlanta Falcons í gær, 21-16, og er þar með komið í úrslitakeppnina fjórða árið í röð. Taysom Hill hefur aðallega verið að hlaupa sjálfur með boltann í mark en að þessu sinni átti hann tvær snertimarkssendingar. Green Bay Packers er í öðru sæti í Þjóðadeildinni með 9 sigra í 12 leikjum en liðið er skrefi nær úrslitakeppninni eftir 30-16 sigur á Philadelphia Eagles.

Cleveland Browns vann 41-35 sigur á Tennessee Titans eftir stórkostlegan fyrri hálfleik þar sem leikstjórnandinn Baker Mayfield átti fjórar snertimarksendingar í fyrri hálfleiknum sem liðið vann 38-7. Browns hefur unnið 9 af 12 leikjum og er í baráttunni um langþráð sæti í úrslitakeppninni.

New York Jets var með níu fingur á fyrsta sigri sínum en kastaði honum frá sér með óskiljanlegri varnartaktík í blálokin sem gaf Derek Carr tækifæri til að kasta 46 jarda snertimarkssendingu. Las Vegas Raiders reis því upp frá dauðum og vann leikinn 31-28. Einhverjir héldu því jafnvel fram að Jets hafði reynt að tapa leiknum til að auka líkurnar á því að fá fyrsta valrétt í næsta nýliðavali.

Innherjinn Darren Waller átti ótrúlegan leik fyrir Radiers, greip þrettán bolta fyrir 200 jördum og skoraði tvö snertimörk. Sigur Las Vegas Raiders sem og sigur New England Patriots (45-0 á e Los Angeles Chargers) heldur á lífi veikri von beggja liða um að komast í úrslitakeppnina.

New York Giants liðið heldur áfram að koma á óvart og nú með 17-12 sigri á Seattle Seahawks. Giants vann þarna sinn fjórða leik í röð eftir að hafa tapað sjö af fyrstu átta leikjum sínum. Seahawks liðið var búið að skora 31,0 stig að meðaltali í leik en komst lítið áleiðis gegn vörn Risanna.

Tap Seattle Seahawks þýddi líka að Los Angeles Rams, sem vann 38-28 sigur á Arizona Cardinals, er komið upp að hlið liðsins í baráttunni um sigurinn í Vesturrriðli Þjóðardeildarinnar. Bæði eru með 8 sigra og 4 töp en Hrútarnir eru ofar á sigri í innbyrðis leik þeirra í síðasta mánuði.