Minkabóndi á alls ekki von á að íslensk stjórnvöld fari sömu leið og dönsk

Það kæmi Einari E. Einarssyni, formanni Sambands íslenskra loðdýrabænda stórlega á óvart ef íslensk stjórnvöld færu sömu leið og dönsk og fyrirskipuðu um aflífun minka hér á landi. Ekki sé hægt að bera Ísland saman við ástandið í Danmörku. Hann finnur til með kollegum sínum í Danmörku sem sjá nú fram á að missa ævistarfið.

Mette Frederiksen, forsætisráðherra Danmerkur, tilkynnti dönsku þjóðinni þann 4. nóvember að öllum minkum í landinu yrði lógað því kórónuveiran hefði stökkbreyst í minkum og borist síðan í menn. Slíkt geti haft áhrif á virkni bóluefnis.

„Ég yrði mjög undrandi ef stjórnvöld hér á landi færu svipaða leið og farin er í Danmörku og ég á alls ekki von á því undir nokkrum kringumstæðum,“ segir Einar.

Sjálfur rekur Einar minkabú að Syðra-Skörðugili í Skagafirði. Hann hefur stundað samfelldan rekstur í um 37 ár. Hann er með 3500 læður og framleiðir að jafnaði um 14.500 skinn á ári.

Hann kveðst ekki hafa miklar áhyggjur smitum í minkabúum á Íslandi, mikið eftirlit sé með minkabúum og mikil fjarlægð sé á milli búa. Einar býst við fulltrúum frá MAST í miðri þessari viku en til stendur að skima fyrir kórónuveirunni í minkabúum landsins.

„Við erum svo lítil í sniðum og svo langt á milli búanna að ég hef ekki nokkra trú á því að það geti skapast neitt sambærilegt ástand og er í Danmörku, það er alveg útilokað. Og rétt að hafa í huga að það er búið að finnast Covid-19 i minkum í allmörgum löndum og Danir þeir einu sé hafa gripið til þessara ráðstafana“.

Á Íslandi eru starfrækt níu minkabú en í Damörku eru þau rösklega þúsund talsins.

„Þeir eru fremstir í þessu; leiðandi í tækninni, ræktun og vísindum. Þar er ofboðslegur fjöldi. Þeir hafa verið að framleiða 12-14 milljónir skinna á ári og við erum að framleiða til samanburðar um 60 þúsund skinn í ár. Við erum eins og pínulítil hneta í skálinni við hliðina á þeim, það er ekki á nokkurn hátt saman að jafna. Ef menn pæla í þessu með fjarlægðir á milli búa, þá hleypur meðalfjarlægð á milli búa hér á landi á tugum kílómetra ef ekki þriggja stafa tölum.“

Einar á fjölmarga vini sem starfa í greininni í Danmörku.

„Það er svakalega þungt í þeim hljóðið og menn skilja ekki að þetta skuli geta gerst með þessum hætti og að það skuli ekki vera einhver vilji til þess að bjarga greininni þó svo að menn hefðu tekið sýktu búin, bændur hafa ekkert á móti því og að menn myndu einbeita sér að þeim þá, eða í það minnsta lokað þeim.“

Einar segir minkabændur vera að fara inn í gjörbreytt umhverfi nú á næstu vikum.

„Nú eru menn að byrja að pelsa og þá fækkar dýrunum um 80-85% á búunum og eftir það verður bara lífdýrastofninn eftir núna í lok mánaðarins. öll smithætta innan eininganna minnkar með færri hausum,“ segir Einar.