Tvær af stjörnum Real Madrid með kórónuveiruna

Eden Hazard og Casemiro greindust jákvæðir fyrir kórónuveirunni í gær og munu því ekki taka þátt í leik helgarinnar með Real Madrid í spænsku úrvalsdeildinni.

Allur leikmannahópur Real Madrid er skimaður á degi hverjum og í gær greindust þessir tveir öflugu miðjumenn með veiruna en aðrir fengu neikvæða niðurstöðu. Brasilíski varnarmaðurinn Eder Militao er í einangrun eftir að hafa greinst með veiruna fyrr í vikunni.

Casemiro og Hazard léku báðir í 3-2 sigri Real Madrid á Inter í Meistaradeild Evrópu á þriðjudag.

Í yfirlýsingu spænska stórveldisins kemur jafnframt fram að enginn hafi greinst smitaður í skimun dagsins í dag en Real Madrid heimsækir Valencia annað kvöld.