Fundu fimmhundruð metra hátt kóralrif undan strönd Ástralíu

Vísindamenn í Ástralíu hafa uppgötvað áður óþekkt en gríðarstórt kóralrif undan ströndum landsins. Rifið er ekki langt frá Kóralrifinu mikla, einu mesta náttúruundri heims, en það sem gerir þetta rif einstakt er sú staðreynd að það er um fimmhundruð metrar á hæð.

Rifið rís upp af hafsbotninum og er langt og mjótt, en það er um einn og hálfur kílómetri á lengd og fimmhundruð metrar á hæð eins og áður sagði. Það gerir rifið töluvert hærra en Empire State byggingin í New York.

Vísindamenn segja vissulega undarlegt að þessi risi hafi ekki fundist áður en það undirstriki einnig hversu lítið menn viti í raun um heimshöfin. Þetta er fyrsta stóra einstaka kóralrifið sem finnst á svæðinu síðan á nítjándu öld.