Sjáðu víta­spyrnu Ramos, markið hjá ungstirninu og hin mörkin úr El Clasico

Real Madrid gerði góða ferð til Katalóníu í gær er liðið vann 3-1 sigur á Barcelona í einum stærsta leik ársins á Spáni; El Clasico.

Það voru ekki liðnar nema átta mínútur þegar fyrstu tvö mörkin voru komin. Federico Valverde kom Real yfir á fimmtu mínútu en þremur mínútum síðar jafnaði hinn ungi og efnilegi Ansu Fati.

Staðan var 1-1 í hálfleik. Eftir rétt rúman klukkutíma fengu hins vegar Madrídingar vítaspyrnu. Að sjálfsögðu fór fyrirliðinn Sergio Ramos á vítapunktinn og skoraði af miklu öryggi.

Börsungar þurftu því að sækja en það voru hins vegar Madrídingar sem skoruðu fjórða mark leiksins. Það gerði Króatinn Luka Modric í uppbótartíma en annar leikurinn í röð sem miðjumaðurinn skorar í.

Real er á toppnum með þrettán stig en það þarf að fara niður í tólfta sætið til þess að finna Barcelona. Þeir eru með sjö stig en eiga þó leik til góða.