Ísland í ruslflokk og bann ef KKÍ neitaði að spila landsleikina í nóvember

Ljóst er að landslið Íslands í körfubolta verða ekki í sínu besta ástandi, vegna skorts á æfingum og leikjum hjá því landsliðsfólki sem búsett er á höfuðborgarsvæðinu, þegar þau leika í undankeppnum stórmóta í nóvember.

Kvennalandslið Íslands heldur til Heraklion á Krít 7. nóvember og karlalandsliðið fer til Bratislava í Slóvakíu tveimur vikum síðar. Liðin leika tvo leiki hvort í sérstökum „búblum“ sem alþjóða körfuknattleikssambandið FIBA, hefur samið sóttvarnareglur fyrir.

Hannes S. Jónsson, formaður KKÍ, segir sambandið hafa látið FIBA vita af æfingabanninu sem verið hefur á höfuðborgasvæðinu á Íslandi frá 8. október, og freistað þess að fá leikjunum frestað en án árangurs.

Eina landið sem vildi ekki spila í nóvember

„Við erum búin að ræða þetta mjög mikið við FIBA, til viðbótar við alla hina fundina sem við höfum verið á undanfarið. FIBA virðist bara ætla að halda því til streitu að vera með þessa „glugga“. Við virðumst vera eina landið sem vill helst ekki spila í nóvember – eyland þar eins og á landakortinu,“ segir Hannes.

„Við viljum helst einbeita okkur að því að mótahaldið í hverju landi sé sem eðlilegast, en virðumst ein um það. Þessar „búblur“ kosta okkur líka mikið,“ segir Hannes. Dýrara sé þó að neita að mæta til leiks, eins og einhverjir hafa velt fyrir sér hvort réttast væri að gera:

„Ef að við myndum hætta við – neita að spila í nóvember – þá yrði okkur bara hent í neðsta styrkleikaflokk alls staðar, fengjum ekki að vera með aftur fyrr en eftir tvö ár og þyrftum að borga fullt af milljónum í sekt.“

Vilja undanþágu fyrir landsliðsfólk til æfinga

Á morgun mega lið á höfuðborgarsvæðinu byrja að æfa að nýju en með ströngum skilyrðum. Til að mynda mega leikmenn ekki kasta bolta á milli sín. Þær reglur gilda til 3. nóvember. Keppni í Dominos-deildunum gæti svo hafist um miðjan nóvember.

Það er því ljóst að margir leikmenn kvennalandsliðsins, sem eiga að fara til Krítar 7. nóvember, verða ekki í leikformi eða sínu besta æfingaformi þegar þær halda utan. Hannes segir að sótt verði um undanþágu fyrir landsliðsfólk til að æfa:

„Það er næsta skref hjá okkur núna. Við höfum verið að bíða eftir því að vita hvaða reglur tækju gildi á morgun. Því miður hefur vantað mikið upp á allt samráð eins og ég hef verið að „tuða“ yfir. Við verðum að geta vitað hlutina fyrr en á síðustu stundu.“

Karlarnir vonandi byrjaðir að spila fyrir landsleiki

Hannes segir vonir standa til þess að búið verði að spila einhverja leiki í Dominos-deild karla þegar karlalandsliðið fer til Slóvakíu, sennilega 21. eða 22. nóvember.

Konurnar mæta Slóveníu og Búlgaríu og eru leikirnir hluti af undankeppni EM, þar sem Ísland hefur þegar lokið útileik sínum við Grikkland og heimaleik við Búlgaríu. Undankeppninni á svo að ljúka í febrúar. Efsta liðið kemst á EM og mögulega liðið í 2. sæti en Ísland hefur tapað báðum leikjum sínum til þessa og er neðst í riðlinum.

Karlarnir eru í forkeppni HM og leika við Lúxemborg og Kósóvó í Slóvakíu, en forkeppninni á svo að ljúka í febrúar. Ísland vann Slóvakíu síðasta vetur en tapaði naumlega fyrir Kósóvó. Tvö lið komast áfram í næstu umferð.