Býður sig fram til vara­for­seta ASÍ

Ragnar Þór Ingólfsson, formaður VR, hyggst bjóða sig fram til embættis varaforseta á þingi Alþýðusambands Íslands í næstu viku. Þetta staðfestir Ragnar í samtali við Morgunblaðið og segir hann mikilvægt að verkalýðshreyfingin vinni í eina átt á tímum sem þessum.

Tvö varaforsetaembætti eru innan Alþýðusambandsins. Kristján Þórður Snæbjarnarson, formaður Rafiðnaðarsambandsins, er 1. varaforseti ASÍ og Sólveig Anna Jónsdóttir, formaður Eflingar, er 2. varaforseti.

Ragnar segist vona að framboðið sé hluti af þeirri vegferð að „þétta raðirnar“. Stór verkefni séu fram undan fyrir hag einstaklinga og heimila. Samfélagið þurfi að vera samstíga í því að takast á við kreppuna sem fylgir kórónuveirufaraldrinum.

Þingið verður sett á miðvikudag í næstu viku og er framboðsfrestur ekki liðinn.