Ítalir sam­þykktu að fækka þing­mönnum um þriðjung

Ítalir hafa ákveðið að fækka þingmönnum á ítalska þinginu um meira en þriðjung. Um sjötíu prósent landsmanna samþykktu breytinguna í þjóðaratkvæðagreiðslu en hún þýðir að þingmönnum í neðri deild þingsins fækkar úr 634 í 400.

Sömuleiðis verður skorið niður í öldungadeildinni en allt í allt fækkar þingmönnum í báðum deildum úr 945 og niður í 600.

Þjóðaratkvæðagreiðslan um fækkun þingmanna var eitt af aðalkosningamálum Fimm stjörnu hreyfingarinnar svokallaða, sem nú situr í ríkisstjórn ásamt fleiri flokkum og voru helstu rök hreyfingarinnar þau að þetta myndi spara stórar fjárhæðir.

Tillagan hafði þegar verið samþykkt á ítalska þinginu sjálfu. Breytingarnar taka gildi fyrir kosningarnar 2023.

Þjóðaratkvæðagreiðslan var haldin samhliða kosningum til sveitarstjórna víðs vegar um landið. 

Í frétt BBC segir að litið sé á sveitarstjórnakosningarnar sem visst áfall fyrir Matteo Salvini, leiðtoga hægriöfgamanna, og sigur fyrir miðjuflokkanna og Giuseppe Conte forsætisráðherra. 

Salvini og liðsmenn flokks hans unnu sigur í héraðinu Marche í austurhluta landsins og hélt völdum í tveimur héruðum til viðbótar. Flokkurinn hafði hins vegar vonast eftir mun fleiri sigrum.