Þrjá­tíu greindust innan­lands

Þrjátíu greindust með kórónuveiruna innanlands í gær. Helmingur þeirra, það er fimmtán, var  ekki í sóttkví við greiningu.

Þetta kemur fram í uppfærðum tölum á vefnum covid.is, en alls hafa þá 164 greinst innanlands síðustu fjóra sólarhringa. Tveir eru á sjúkrahúsi vegna Covid-19 líkt og í gær.

Þrjú smit greindust á landamærum, en þar er beðið niðurstöðu mótefnamælingar.

242 manns eru nú í einangrun, samanborið við 215 í gær. Þá fjölgar þeim mikið sem eru í sóttkví, eru 2.102 í dag en 1.290 í gær.

Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur er 59,7 en var 51,5 í gær. Þá er nýgengi landamærasmita nú 4,6 en var 5,7 í gær.

Nú hafa 2.377 manns greinst smitaðir af kórónuveiru frá upphafi faraldursins. Tíu þeirra sem hafa veikst af Covid-19 eru látnir.

Alls voru tekin 1.134 einkennasýni hjá sýkla- og veirufræðideild Landspítalans og Íslenskri erfðagreiningu í gær og 759 sýni á landamærunum eða í seinni landamæraskimun. Þá voru 138 sýni tekin í annarri skimun hjá Íslenskri erfðagreiningu.