Slæmt veður á Íslandi gæti truflað Söru og Björgvin Karl á heimsleikunum í ár

Sara Sigmundsdóttir og Björgvin Karl Guðmundsson fá seinna í þessum mánuði tækifæri til að keppa á heimsleikunum í CrossFit hér heima á Íslandi því fyrri hluti heimsleikana í ár fer fram í gegnum netið.

Keppendur vita lítið um keppnina ennþá en þau fengu þó einhverjar upplýsingar á fjarfundi með fulltrúum CrossFit samtakanna á dögunum.

Vefsíðan Morning Chalk Up hefur grafið upp upplýsingar um það sem fór fram á umræddum fjarfundi með keppendunum þar á meðal um hvaða græjur keppendurnir þurfa að verða sér út um.

Sara Sigmundsdóttir og Björgvin Karl Guðmundsson keppa því bæði á heimsleikunum á heimavelli og eiga bæði góða möguleika á að komast í fimm manna ofurúrslit ef marka má frammistöðu þeirra á tímabilinu til þessa.

Sara og Björgvin Karl eru tveir af þremur íslenskum keppendum á heimsleikunum í ár en sá þriðji, Katrín Tanja Davíðsdóttir, keppir í Bandaríkjunum þar sem hún æfir.

Samkvæmt frétt Morning Chalk Up þá vita keppendurnir ekki enn neitt um það hversu marga daga keppnin um standa eða hversu lengi hver keppnisdagur verður.

Keppendur fengu aftur á móti að vita hvaða tól og tæki þurfa að vera til staðar í líkamsræktarsalnum þar sem þau munu keppa.

Sara og Björgvin Karl njóta bæði góðs af því að hafa keppt við svipaðar aðstæður á Rogue Invitational mótinu í júní en allt það mót fór í gegnum netið þar sem Sara keppti í Simmagym í Reykjanesbæ og Björgvin Karl í CrossFit Hengill í Hveragerði.

Samkvæmt heimildum Morning Chalk Up þá kom ekkert á óvart varðandi tækjalistann sem er í samræmi við það sem þarf til þegar keppendur skila æfingum fyrir „The Open“ hlutann. Eina græjan sem var óvenjuleg var GHD kviðæfingatæki.

Hver keppandi mun hafa með sér dómara sem vottar það að keppandinn sé að gera æfingarnar rétt og að upplýsingar um tíma, þyngdir og endurtekningar séu réttar.

Það verður líka bannað að gera æfingar með einhverjum öðrum eða að hafa klapplið með sér. Hver og einn keppandi þarf að gera æfingarnar einn og aðeins fyrir framan umræddan dómara.

Það kom líka fram að keppendur þurfa að hlaupa úti í einhverri æfingunni og þeir þurfa að vera sér úti um mælitæki til að staðfesta um rétta vegalengd sér að ræða.

Það hefur verið mikið um hlaupaæfingar í byrjun síðustu heimsleika og það þarf því ekki að koma mikið á óvart að sprettir og hugsanlega einhver langhlaup séu á æfingalistanum í ár.

Veðrið í september er oftast mjög fínt á flestum stöðum í heiminum en það er ekki alveg hægt að treysta á það hér heima á Íslandi.

Sara Sigmundsdóttir og Björgvin Karl Guðmundsson þurfa því að vonast til þess að einhver af haustlægðunum sé ekki að flækjast hér á landi þegar heimsleikarnir fara fram.

Það væri nú ekki mjög sanngjarnt ef þau þyrftu að hlaupa út í íslensku roki og rigningu á meðan samkeppnisaðilar þeirra keppa við bestu aðstæður á sínum stað.

CrossFit samtökin ætla ekki að gera æfingarnar opinberar fyrr en nokkrum dögum fyrir keppni til að koma í veg fyrir að keppendur geti undirbúið sig markvisst fyrir ákveðnar greinar.

Eina sem er staðfest er að heimsleikarnir hefjast 18. september næstkomandi.