Vindasamt og ófært víða um land í dag

Gular veðurviðvaranir eru í gildi á Suðurlandi, Ströndum og Norðurlandi vestra, Suðausturlandi, miðhálendinu og við Faxaflóa í dag.

Á vef Veðurstofunnar kemur fram að hvasst verði á landinu í dag, og þá sérstaklega við suður og suðausturströnd landsins. Eins nokkuð hvasst í Skagafirði.

Vindhraði verður víða 13-20 metrar á sekúndu og þar sem ekki hefur hlánað ofan í snjó skefur mjög auðveldlega, það gæti átt við víða inn til landsins og á fjallvegum.

Verulega gæti hvesst á Kjalarnesi og við Hafnarfjall síðar í dag. Veður á morgun verður með svipuðu móti, en rólegra fram í vikuna.

Vetrarfærð í öllum landshlutum

Vetrarfærð er í öllum landshlutum og víða ófært. Þjóðvegur 1 um Mývatnsöræfi og Möðrudalsöræfi er þannig lokaður, sem og Vopnafjarðarheiði. Einnig er Fjarðarheiði lokuð. Þá er ófært um Hófaskarð á Norðausturlandi.

Þungfært er á Siglufjarðarvegi frá Ketilás í Siglufjörð og þæfingur og skafrenningur á Þverárfjalli.

Eins er þæfingur í Þrengslum og þungfært á Mosfellsheiði.

Þá er ófært á Vatnsskarði eystra, en greiðfært með ströndinni í Höfn þrátt fyrir allhvassan vind.

Þjóðvegur 1 yfir Skeiðarársand og í Öræfasveit er lokaður frá Fosshótel Núpum að Jökulsárlóni.

Óvissustigi hefur verið lýst yfir undir Eyjafjöllum, frá Markarfljóti í Vík og gæti komið til lokana með stuttum fyrirvara.

Veðurhorfur á landinu næstu daga, samkvæmt vef Veðurstofunnar:

Á þriðjudag:

Austan 8-15 m/s, en hægari síðdegis. Slydda eða snjókoma á NA- og A-landi og einnig um tíma SV-lands, annars úrkomulítið. Hiti kringum frostmark.



Á miðvikudag:

Sunnan 3-8 og dálítil él á S-verðu landinu, en bjartviðri N-lands. Frost 0 til 8 stig, kaldast norðan heiða.



Á fimmtudag:

Norðaustan 8-13 og snjókoma á Vestfjörðum, annars hægari og sums staðar él við ströndina. Frost 0 til 8 stig, en kaldara í innsveitum um kvöldið.



Á föstudag:

Norðlæg átt og dálítil él N-lands, en léttskýjað S-til á landinu. Kalt í veðri.



Á laugardag:

Útlit fyrir norðaustanátt með éljum N- og A-lands.