KR í sóttkví í þriðja sinn í sumar vegna smits

KR-konur í fótbolta eru komnar í sóttkví eftir að smit greindist hjá liðinu. Er þetta í þriðja sinn sem að leikmenn úr liðinu þurfa að fara í sóttkví í sumar.

Þetta staðfestir Páll Kristjánsson, formaður knattspyrnudeildar KR, við Fótbolta.net í dag. Hann segir ekki ljóst hvort að allur leikmannahópurinn þurfi að fara í sóttkví. Smitrakning sé í gangi.

Samkvæmt frétt RÚV er um aðila í starfsliði meistaraflokks kvenna að ræða og Vísir hefur fengið staðfest að ekki er um leikmann að ræða. Líklegt er hins vegar að leikmannahópurinn og þjálfarar þurfi að fara í sóttkví.

Tímabilið hefur verið erfitt fyrir KR sem er í fallsæti í Pepsi Max-deildinni, en þó jafnt næstu tveimur liðum að stigum og með leik til góða. Í júní fór liðið í tveggja vikna sóttkví eftir að hafa spilað gegn smituðum leikmanni í leik við Breiðablik, og liðið var einnig í sóttkví fyrri hluta þessa mánaðar.

KR átti að mæta Selfossi í kvöld í Pepsi Max-deildinni en síðasti leikur liðsins var gegn Val á mánudaginn.