Alþjóða krabbameinsdagurinn: 70% dauðsfalla í þróunarríkjum

Alþjóðlegi krabbameinsdagurinn – World Cancer Day – er í dag, 4. febrúar, og hefur tvíþættan tilgang, annars vegar að vekja almenning til vitundar um krabbamein og veita fræðslu og hins vegar felur hann í sér hvatningu til stjórnvalda og einstaklinga um heim allan að grípa til aðgerða gegn sjúkdómnum. Krabbamein er næstalgengasta dánarorsök í heiminum í dag og dregur um 9,6 milljónir einstaklinga til dauða ár hvert, um 70% þeirra í þróunarríkjum.

Upplýsingaskrifstofa Sameinuðu þjóðanna (UNRIC) bendir á að samkvæmt heimsmarkmiðunum um sjálfbæra þróun eigi að fækka ótímabærum dauðsföllum af völdum krabbameins og annarra krónískra sjúkdóma fyrir 2030. Þar segir að árið 2017 hafi Alþjóða heilbrigðisþingið samþykkt ályktun með hvatningu til ríkisstjórna og Alþjóða heilbrigðismálastofnunarinnar (WHO) að hraðað verði aðgerðum til að ná þeim árangri sem stefnt er að heimsmarkmiðunum.

Á Íslandi létust árið 2018 alls 585 einstaklingar úr krabbameini, 299 karl og 286 konur. Að meðaltali fimm árin á undan, 2014-2018, létust að meðaltali 616 á hverju ári. Á sama tímabili greindust árlega að meðaltali 832 ný mein hjá körlum og 815 hjá konum, samkvæmt upplýsingum Krabbameinsfélags Íslands.

Auknar lífslíkur

Í frétt UNRIC segir að líkur krabbameinssjúklinga á að lifa af hafi aukist verulega í ríkjum sem státa af góðu heilbrigðiskerfum, þökk sé snemmbærri greiningu, hágæða meðferð og góðri eftirfylgni. „Í lág- og meðaltekjuríkjum getur fjöldinn allur af krabbameinssjúklingum ekki treyst á snemmbæra greiningu, læknisþjónustu á viðráðanlegu verði eða fullnægjandi læknismeðferð. Um það bil 70% þeirra sem látast úr krabbameini í heminum koma frá lág- eða meðaltekjuríkjum,“ segir í fréttinni.

Meðfylgjandi skýringarmynd fylgir frétt UNRIC 

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.