Gular við­varanir vegna sunnan­storms og leysinga

Veðurstofa Íslands hefur gefið út gular viðvaranir um land allt vegna sunnanstorms og leysinga.

Varað er við leysingum á öllu landinu og má reikna með vatnavöxtum og auknum líkum á krapaflóðum. Eru íbúar hvattir til að hreinsa frá niðurföllum og fráveituskurðum. Viðvaranir vegna leysinga tóku gildi klukkan 16 í dag og standa til klukkan 12 á fimmtudag.

Á Breiðafirði, Vestfjörðum, Ströndum og Norðurlandi Vestra og Norðurlandi eystra er síðan varað við sunnanstormi en þó ekki fyrr en á fimmtudag. Er veðrið sem spáð er varasamt ökutækjum sem taka á sig mikinn vind.

Viðvaranirnar taka gildi á fimmtudagsmorgun og standa mislengi fram eftir degi eftir landshluta. Á Breiðafirði er gul viðvörun í gildi frá klukkan fimm á fimmtudagsmorgun og til klukkan 11.

Er spáð sunnan 15 til 23 metrum á sekúndu með staðbundnum vindstrengjum að 35 metrum á sekúndu.

Á Vestfjörðum tekur gul viðvörun gildi klukkan sjö á fimmtudagsmorgun og stendur til klukkan 13. Sunnan 15 til 23 metrar á sekúndu með staðbundnum vindstrengjum allt að 40 metrum á sekúndu.

Sama er uppi á teningnum á Ströndum, Norðurlandi vestra og Norðurlandi eystra þar sem viðvörunin gildir reyndar aðeins lengur, eða frá klukkan sex á fimmtudagsmorgni til klukkan 15.

Má búast við staðbundnum vindstrengjum að 40 metrum á sekúndu á Ströndum og Norðurlandi vestra sem og á Tröllaskaga og í Eyjafirði.