Gefur Renda tertu í tilefni af draugslegri rannsókn á starfsemi Lindarhvols

Skafti Harðarson formaður Samtaka skattgreiðenda, tók sig til nú rétt í þessu og afhenti Ríkisendurskoðanda tertu. Tilefnið er kúnstugt.

„Með þessari súkkulaðiköku er ég að vekja athygli á því að nú eru tvö ár liðin frá því að starfsemi Lindarhvols var formlega hætt. Það er með ólíkindum hve lengi við skattgreiðendur eigum að bíða eftir að fá sjálfsagðar upplýsingar um starfsemi þessa félags sem sýslaði með milljarða króna eigur skattgreiðenda,“ segir Skafti.

Af þessum orðum Skafta má ráða að hátíðlega gjöf sé með ískrandi háðskum undirtóni.

Ógagnsæi um reksturinn

Fyrir tveimur árum, þann 7. febrúar 2018, birtist tilkynning sem lítið fór fyrir á vefsíðu Lindarhvols (Lindarhvolleignir.is). Hún greindi frá því að starfsemi félagsins væri lokið og að samningur Lindarhvols við ráðuneytið félli niður frá og með 7. febrúar 2018 og í kjölfarið yrði félaginu slitið. Fjölmiðlar hafa ekki haft erindi sem erfiði við eftirgrennslanir sínar. Þannig sendi Vísir fyrirspurn til Ríkisendurskoðanda fyrir um hálfum mánuði sem ekki var svarað. Markaður Fréttablaðsins birti frétt fyrir um viku þar sem fram kemur að hlutaeigandi hafi fengið drög til umsagnar. Þar virðist sem menn séu að séu að safna vopnum sínum.

„Stjórn Lindarhvols gerir margvíslegar athugasemdir við skýrslu Ríkisendurskoðunar, sem telur um 70 blaðsíður en er ekki endanleg útgáfa, í afar ítarlegri umsögn sem hún skilaði til stofnunarinnar síðastliðinn föstudag,“ segir þar.

Lindarhvoll ehf. stofnað 15. apríl 2016. Í því átti að halda utan um eigur ríkisins í mismunandi einkahlutafélögum sem féllu til vegna nauðasamninga við slitabú föllnu bankanna. Á huldu er hve miklum eða hve verðmætum eignum þeim einstaklingum, sem sátu í stjórn Lindarhvols, var treyst fyrir. Af lestri ársreikninga þeirra er ljóst að þar í gegn runnu himinháar fjárhæðir. Skafta er ekki skemmt.

„Mikið var talað um gagnsæi þegar einkahlutafélagið Lindarhvoll var stofnað inni í fjármálaráðuneytinu – en enginn hefur hugmynd um hve miklar eignir fóru þarna um, hverjir keyptu þær, á hvaða verði og hvort almennilega var staðið að þessu. Raunar grunar mig að þarna hafi pottur illilega verið brotinn en lögbundinni úttekt á starfseminni hefur ekki enn verið lokið nú tveimur árum síðar! Henni hefði átt að ljúka einhverjum mánuðum eftir að starfseminni lauk en ég held að þetta sé orðið að heitri kartöflu í kerfinu.“

Úthlutuðu eigum almennings fyrir milljarða króna

Skafti bendir á að fullkomið ógagnsæi hafi ríkt um starfsemi Lindarhvols, þvert á stefnuyfirlýsingu ríkisstjórnarinnar og raunar allra flokka á Alþingi.

„Staðreyndin er sú að örfáum einstaklingum, embættismönnum og vildarvinum var falið að selja ríkiseigur fyrir milljarða króna án nokkurs eftirlits svo að vitað sé. Þess var gætt að ekkert væri um félagið að finna á „opnir reikningar“. Ættu skattgreiðendur að óttast eitthvað, er það ógagnsæ meðferð á eignum ríkisins.“

Skafti lofar því að mæta með köku að ári ef úttektinni verður ekki lokið þá. Það er eins og hann geri ekkert síður ráð fyrir því.

„Eina sem við skattgreiðendur vitum núna er að stjórn Lindarhvols hefur upplýst fjölmiðla um að hún sé ósátt við drögin að úttektinni og skilað tugum blaðsíðna af athugasemdum. Ætli við skattgreiðendur fáum ekki reikninginn fyrir þessum athugasemdum frá lögmannsstofu nefndarinnar en sumir virðast hreinlega hafa komist yfir gullgerðarvél, þegar kemur að fjármunum ríkisins. Og það er galið!“ segir Skafti sem veit ekki hvort hann á að gráta eða hlæja.