Einelti á vinnustað hefur meiri líkamleg áhrif en áður var talið

Það hefur lengi verið vitað að áhrif eineltis geta verið mikil og langvarandi á andlega heilsu.  Þetta á hvoru tveggja við einelti sem fólk verður fyrir í æsku eða sem fullorðið fólk í atvinnulífinu.  Þá hefur verið talað um að líkamleg áhrif svipi oft til kvíða- og streitueinkenna, s.s. lystarleysi, ofát, svefntruflanir, magaverkir og fleira.

Nú hafa rannsóknir sýnt að áhrif eineltis í vinnu hefur meiri áhrif á líkamlega heilsu en áður var vitað.  Nýverið greindi BBC frá því að einelti í vinnunni leitt til þess að líkur á hjartavandamálum aukast og meiri líkur eru á að fólk fái sykursýki 2.

Í rannsókn sem gerð var í háskólanum í Kaupmannahöfn voru gögn tæplega 80.000 einstaklinga  í Svíþjóð og Danmörku skoðuð.  Einstaklingarnir voru bæði karlar og konur á aldrinum 18-65 ára. 

Spurt var hvort viðkomandi einstaklingar hefðu upplifað einelti í vinnu.  Síðan voru heilsufarsupplýsingar um viðkomandi skoðaðar og fylgst með þeim í fjögur ár.  European Heart Journal birti niðurstöður rannsóknarinnar árið 2018.

Því meira einelti, því meiri líkur á heilsubresti

Samkvæmt rannsókninni sögðust 8-13% starfsmanna hafa upplifað einelti í vinnunni.  Heilsufarsupplýsingar viðkomandi mældust síðan þannig að hjá þessum einstaklingum voru 59% meiri líkur á að viðkomandi myndi glíma við hjartavandamál síðar á ævinni, jafnvel hjartaáfall. 

Því meira eða oftar sem viðkomandi hafði upplifað einelti, því meiri mældust líkurnar.  Það sama gilti um bæði konur og karlmenn.

Meiri líkur á hjartavandamálum voru þó ekki einu áhrifin á líkamlega heilsu því rannsóknin sýndi sömu fylgni þegar kom að líkum þess að einstaklingur þrói með sér sykursýki 2, eða áunna sykursýki.  Þar sýndu niðurstöður að 46% meiri líkur væru á að einstaklingar sem höfðu upplifað einelti í vinnu, myndu fá sykursýki 2 næsta áratug á eftir.

Á vefsíðu Vinnueftirlitsins má finna upplýsingar um viðbrögð við einelti á vinnustöðum og þar segir m.a.:

,,Mikilvægt er að starfsmaður, sem orðið hefur fyrir einelti, áreitni eða ofbeldi á vinnustað eða hefur vitneskju um slíkt, upplýsi atvinnurekanda eða vinnuverndarfulltrúa vinnustaðarins, svo hægt sé að bregðast við eins fljótt og kostur er.“