Hafa orðið fyrir um­fangs­miklum tölvu­á­rásum síðustu daga

Áströlsk fyrirtæki og stofnanir hafa orðið fyrir umfangsmiklum tölvuárásum síðustu daga og ríkisstjórn landsins segir að árásirnar séu svo vel skipulagðar og flóknar að ónafngreindu ríki sé augljóslega um að kenna.

Scott Morrison, forsætisráðherra landsins, hélt blaðamannafund í nótt þar sem hann fór yfir málið.

Hann neitaði að fara nánar út í hvaða land væri talið sökudólgurinn í málinu en öryggissérfræðingar eru flestir á því að þrjú ríki komi helst til greina, Kína, Rússland og Norður-Kórea.

Forsætisráðherrann sagði að enn sem komið sé hafi tölvuþrjótarnir ekki komist yfir meiriháttar persónugreinanlegar upplýsingar, en hvatti hann einstaklinga og fyrirtæki að efla varnirnar í tölvukerfum.