Tvíræður texti og grafísk tilvísun í hálendi Íslands

Hönnuðirinn og listakonan Ragna Ragnarsdóttir sýnir á HönnunarMars í ár sérstaka húfu sem hönnuð var í samstarfi við 66°Norður. Húfan nefnist einfaldlega Ragna rok.  Stefna 66°Norður er að gera sérstaka útgáfu af húfukollunni árlega í samstarfi við íslenska hönnuði á HönnunarMars, en hingað til hefur verið unnið með Þórunni Árnadóttur, Or Type og Hildi Yeoman.

„Ég var svolítið að vinna með það sem ég hef verið að vinna með í minni hönnun,“ segir Ragna í samtali við Vísi. Hún vildi búa til fallegt landslag í litum sem henni fannst passa saman.

„Ég vildi athuga hvernig væri hægt að gera það með textíl, því hef aldrei unnið með textíl áður. Þetta er því öðruvísi en ég er vön að gera.“

Ragna Rok húfan er tilvísun í fyrri verk hönnuðarins Rögnu Ragnarsdóttur þar sem hún vinnur með lagskipta liti. Útkoman á húfunni er landslag sem á svipstundu getur farið „út í veður og vind“. Á framhlið húfunnar er grafísk tilvísun í hálendi Íslands, en sé henni snúið við þá koma í ljós orðin „Út í veður og vind.“ Húfan verður til sýnis og sölu í völdum verslunum 66°Norður á meðan HönnnunarMars stendur.

„Út í veður og vind er fyrir mér hvetjandi, að fara út í veður og vind, sama hvernig veðrið er. Svo getur þetta líka verið að allt er farið út í veður og vind. Það er pínu skemmtilegt.“

Húfuna hannaði Ragna á methraða fyrr á árinu en svo var HönnunarMars frestað fram í júní. Hún er þó ánægð með að hafa verið að vinna þetta með þessum hætti.

„Samstarfið var hratt og gekk vel. Ef ég er með pressu þá vinn ég best.“

Ragna er einnig sjálf með sýningu á HönnunarMars á ljósaskúlptúrum. Áhugasamir geta kynnt sér hönnun hennar betur á Instagram en sýningin opnar í næstu viku.

„Þetta eru ljós sem ég er búin að vinna að ótrúlega lengi. Rosalega nýtt, ég hef ekki verið að gera ljós áður.“

Ragna segir að það sé ýmislegt tæknilegt sem maður brenni sig á en ferlið hafi verið lærdómsríkt.

„Ég valdi einföld form og einfalda liti, þetta er mjög ferskt miðað við það sem ég hef verið að gera.“