Mesti samdráttur frá Kreppunni miklu

Samdráttur á hagkerfi heimsins verður sá mesti í áratugi að mati Alþjóðagjaldeyrissjóðsins (AGS). Efnahagsþrengingarnar vegna kórónuveiruheimsfaraldursins eru þær mestu frá því í Kreppunni miklu á 4. áratug síðustu aldar.

Sjóðurinn spáir 3% samdrætti á heimsvísu á þessu ári og segir heiminn standa frammi fyrir neyðarástandi sem eigi sér ekki hliðstæðu. Hann varar jafnframt við því að dragist faraldurinn á langinn muni það reyna á getu ríkisstjórna og seðlabanka til að hafa hemil á ástandinu, að sögn breska ríkisútvarpsins BBC.

Gita Gopinath, aðalhagfræðingur AGS, segir að landsframleiðsla ríkja heims gæti dregist saman um níu biljónir dollara á næstu tveimur árum. Þrátt fyrir að hagvöxtur gæti náð sér á strik á næsti ári ef faraldurinn rénar á seinni hluta þessa árs verði landsframleiðsla enn minni en áður en faraldurinn brast á.

„Mun verri vaxtarsviðsmyndir eru mögulegar og kannski jafnvel líklegar,“ segir Gopinath sem bendir á að þetta sé í fyrsta skipti frá Kreppunni miklu sem búist er við því að jafnt iðn- sem þróunarríki lendi í samdrætti.

Þannig er nú spáð 6,5% samdrætti í Bretlandi á þessu ári og bandaríska hagkerfið gæti skroppið saman um 5,9%. Vestanhafs er jafnframt spáð allt að 10,4% atvinnuleysi á árinu.

Fleiri þurfa niðurfellingu skulda næstu misserin

Alþjóðagjaldeyrissjóðurinn samþykkti í dag að fella niður afborganir 25 ríkja af skuldum þeirra í sex mánuði, fyrst og fremst fátækra Afríku- og Asíulanda, til að létta þeim lífið á meðan heimsfaraldurinn geisar. Sjóðurinn telur að fjöldi ríkja eigi eftir að þurfa á frekari niðurfellingu skulda á næstu mánuðum og árum.

Þrátt fyrir efnahagslega blóðtöku leggur sjóðurinn áherslu á að aðgerðir ríkja heims til þess að hefta útbreiðslu faraldursins eins og félagsforðun og sóttkví séu bráðnauðsynlegar. Samdrátturinn hefði getað orðið enn verri ef ekki hefði verið gripið til slíkra aðgerða.

Leggur sjóðurinn til að ríki setji aukið fé í heilbrigðiskerfið og styðji launafólk og fyrirtæki fjárhagslega. Seðlabankar þurfi að halda áfram að örva hagkerfið og stjórnvöld þurfi að gera skýrar áætlanir um hvernig ríkin nái vopnum sínum eftir að faraldurinn er um garð genginn. Þá sé mikilvægt að ríki heims vinni saman að því að þróa og dreifa bóluefni og meðferð gegn sýkingu.