Róbert Daði fyrstur inn í undanúrslit

Á miðvikudag hófust 16-liða úrslit í eFótbolta og var Róbert Daði Sigurþórsson fyrstur til að tryggja sér sæti í undanúrslitum mótsins. Frá þessu var greint á vef KSÍ.

Róbert Daði vann Aron Þormar Lárusson, liðsfélaga sinn hjá Fylki þar sem Róbert tryggði sig áfram með marki í uppbótartíma. Síðar í dag kemur í ljós hvaða þrír keppendur fylgja honum í undanúrslit.

Fyrstur til að vinna fimm leiki fer í undanúrslit og næstu tveir sem ná sex sigrum vinna sér einngi inn sæti í undanúrslitum mótsins.

Mótið heldur áfram í beinni útsendingu á Twitch-síðu KSÍ klukkan 18:30.

Bjarki Már Sigurðsson mætir Aroni Þormari, en báðir leika með Fylki. Bjarki Már er ekki samningsbundinn Fylki þó hann leiki með þeim í mótinu.

Jóhann Ólafur Jóhannsson, FH, mætir Ásgeiri Karlssyni, leikmanni Fylkis.

Sex leikmenn hafa unnið tvo leiki og tapað tveimur og hefja þeir daginn á því að leika innbyrðis. Því er ljóst að þrír af þeim verða dottnir úr leik eftir fyrsta leik dagsins. Þeir sem mætast eru:

Alexander Aron Hannesson, Keflavík gegn Agnari Þorlákssyni, KR. Tindur Örvar Örvarsson, Elliða, gegn Skúla Arnarsyni, Gróttu. Leifur Sævarsson, LFG, gegn Heiðari Ægissyni, LFG.

Liðsmenn LFG hafa staðið sig vel á mótinu, en þurfa nú að mæta hvor öðrum í baráttu um að halda lífi í vonum sínum um sæti í undanúrslitum.

Það eru því 10 leikmenn sem keppa um þrjú laus pláss í úrslitum í dag. 

Undanúrslitin og úrslitin fara svo fram 18. apríl og verða í beinni útsendingu á Stöð 2 eSport.