Segja sýni úr konunni á hjúkrunarheimilinu Eir hafa sýnt fram á veiklaðar veirur

Konan sem greindist með Covid-19 og var á endurhæfingardeild hjúkrunarheimilisins Eir var líklega komin yfir veikindin við komuna á Eir og því að öllum líkindum ekki smitandi. Í tilkynningu til aðstandenda kemur fram að sýni úr konunni hefði leitt í ljós veiklaðar veirur eða veirubrot þótt sýnið hafi sannarlega verið jákvætt.

Síðasta laugardag var staðfest að viðkomandi skjólstæðingur hefði verið með Covid-19 eftir að þrjú sýni voru tekin. Konan var flutt af hjúkrunarheimilinu og á Landspítalann þegar grunur kom upp um smit deginum áður.

Í samráði við sóttvarnalækni og smitsjúkdómalækna Landspítala hefur verið ákveðið að draga úr sóttvarnaaðgerðum á Eir í áföngum. Til að gæta ítrustu varúðar verður endurhæfingardeild heimilisins þó áfram í sóttkví til og með 13. maí. Tuttugu og fjögur rými eru á endurhæfingardeild Eirar þar sem tekið er á móti eldri borgurum af sjúkrahúsi til endurhæfingar í einn til þrjá mánuði í senn.

Aðrar heimilisdeildir verða opnaðar fyrir heimsóknum, í þeirri mynd sem leyfilegt er, frá og með mánudeginum 11. maí.