Matthías Johannessen sannfærður um samsæri gegn Haraldi syni sínum

Matthías Johannessen, fyrrverandi ritstjóri Morgunblaðsins og áhrifamaður í Sjálfstæðisflokknum til lengri tíma, er á þeirri skoðun að Sjálfstæðisflokkurinn hafi komið illa fram við Harald Johannessen, son hans og ríkislögreglustjóra. Þetta segir Matthías í samtali við Stundina.

Haraldur gerði á dögunum starfsflokasamning við íslenska ríkið sem felur í sér að hann fær greiddar 57 milljónir króna á tveggja ára tímabili en frá áramótum mun hann sinna ráðgjafarstörfum fyrir dómsmálaráðuneytið.

Guðmundur Magnússon, sagnfræðingur og fyrrverandi blaðamaður, fullyrti á Facebook í gær að Matthías hefði sagt sig úr Sjálfstæðisflokknum.

„Hvað sem mönnum kann að finnast um flokkinn held ég að þetta sé slæmur missir fyrir hann,“ segir Guðmundur í færslu sinni á Facebook. Hann þekkir vel til innan Sjálfstæðisflokksins en hann hefur boðið fram fyrir flokkinn í borginni.

Matthías vildi í samtali við Vísi í gærkvöldi ekki staðfesta að hann hefði sagt sig úr flokknum. Hann neitaði því heldur ekki. Sagði einfaldlega um hans einkamál að ræða. Hann segir hins vegar í samtali við Stundina að honum hafi þótt Sjálfstæðisflokkurinn koma illa fram við Harald son sinn.

„Mér þótti það, mér þótti það. Þetta er reynslulítið fólk og þetta er ekkert mitt kompaní. Þetta var náttúrulega einhvers konar samsæri gegn drengnum. Að mínu mati.“

Þá hafi hann engan áhuga á íslenskri pólitík og hafi ekkert samband við Sjálfstæðisflokkinn.