Flutti í fjarlægan fjörð til að vinna dýrustu landbúnaðarvöru Íslands

Fyrirtæki sem fullvinnur æðardún hefur verið sett á stofn á Borgarfirði eystra. Þar er þessi dýrasta landbúnaðarvara Íslands sett í sængur og þær síðan seldar sem lúxusvara. Þetta mátti sjá í fréttum Stöðvar 2. 

Í þessu eitthundrað manna byggðarlagi munar um þau tvö til þrjú störf sem framkvæmdastjóri Íslensks dúns ehf., Ragna Óskarsdóttir, vonast til að skapist í litla bláa húsinu, sem áður þjónaði sem leikskóli byggðarinnar. Núna er þar dúnmjúk starfsemi. 

Ragna segir tækifærin í æðardúni vannýtt.

„Vegna þess að við Íslendingar framleiðum um 75 prósent heimsframleiðslu æðardúns en við flytjum hann að megninu til út sem hrávöru til Japans og Þýskalands, þar sem hann er þveginn og settur í sængur, og með miklum hagnaði fyrir þarlenda aðila. Við viljum sem sagt koma fullvinnslunni hingað heim til Íslands,“ segir Ragna. 

Dúninn setja þau i sængur.

„Það gengur ótrúlega vel að selja þetta. Við í rauninni fórum bara af stað núna í sumar og hérna sérðu það sem er búið að panta nú þegar og við afhendum í nóvember. Þetta er að fara fram úr okkar björtustu vonum.“ 

Hér er höndlað með mikil verðmæti; dýrustu landbúnaðarvöru Íslands, segir Ragna. Æðardúninn fá þau úr næsta nágrenni, frá Sævarenda í Loðmundarfirði, stærsta varpi Íslands, að sögn Rögnu.

Æðarbóndinn Ólafur Aðalsteinsson fagnar því að fá vinnuna í heimabyggð. 

„Þetta var alveg óskastaða að þetta kæmi, að það væri hægt að fullvinna dúninn, í stað þess að senda þetta til útlanda eins og hverja aðra hrávöru,“ segir Ólafur á Sævarenda. 

Sjá einnig: Sauma silkisængur fyrir ríka útlendinga

Ástrós dóttir Rögnu er flutt úr borginni austur á Borgarfjörð til að vinna í dúninum með öðru. 

„Núna er ég komin með tvær vinnur hérna.“ 

-Hvernig líst þér á þig hérna? 

„Mjög vel. Þetta er bara frábær staður,“ svarar Ástrós Bergsveinsdóttir.

Hér má sjá frétt Stöðvar 2: