Tesla fær að smíða bíla í Kína

Tesla hefur fengið grænt ljós á að smíða bíla í Kína. Framleiðandinn ætlar að reisa verksmiðju í austurhluta Sjanghæ. Verksmiðjan mun heita Gigafactory 3 eða Gígaverksmiðja 3. Hinar tvær eru Nevada og New York í Bandaríkjunum.

Gangi áætlanir Tesla upp munu um 1000 eintök af Tesla Model 3 rúlla út úr verksmiðjunni á viku. Ætlunin er að koma verksmiðjunni í gagnið á næstu vikum. Undirbúningur hefur verið í gangi í þónokkurn tíma. Framkvæmdir hófust í janúar.

Ein helsta ástæða þess að Tesla vill hefja framleiðslu í Kína er til að komast framhjá háum innflutningstollum á bandarískum bílum til Kína. Kínverski markaðurinn er stærsti einstaki kaupendamarkaður á bílum í heiminum.

Yfirvöld í Sjanghæ hafa aðstoðað Tesla við að koma verksmiðjunni á laggirnar og kínversk yfirvöld hafa ákveðið að 10% skattur á nýja bíla verði ekki lagður á Tesla bifreiðar.