Ísland hafnaði í 5.sæti eftir sigur á Grikkjum

Íslenska kvennalandsliðið í handbolta skipað leikmönnum 19 ára og yngri lauk keppni í 5.sæti B-deildar EM kvenna eftir sjö marka sigur á Grikklandi í dag.

Aldrei var spurning um hvoru megin sigurinn myndi lenda í leiknum um 5.sætið í dag en íslensku stelpurnar höfðu sex marka forystu í leikhléi, 18-12.

Fór að lokum svo að öruggur sigur vannst, 29-22 og fimmta sætið tryggt.

Berta Rut Harðardóttir var atkvæðamest í sóknarleik íslenska liðsins me sex mörk en þær Erna Guðlaug Gunnarsdóttir og Birta Rún Grétarsdóttir gerðu fjögur mörk hvor og þær Katla María Magnúsdóttir, Tinna Björgvinsdóttir og Anna Hansdóttir þrjú mörk hver.