Höldur kaupir bílasölu á Höfða

Bílaleiga Akureyrar/Höldur hefur fjárfest í bílasölunni Bílalíf. Þetta staðfestir Steingrímur Birgisson, forstjóri Hölds, í samtali við Markaðinn en gengið var frá kaupunum í síðustu viku. Bílalíf, sem er á Kletthálsi, er ein af elstu bílasölum landsins og hefur verið í eigu sömu fjölskyldunnar frá 1984.

Aðspurður segir Steingrímur að kaupin feli ekki í sér neinar breytingar á bílaleigurekstrinum. „Við erum í samstarfi við nokkrar bílasölur á höfuðborgarsvæðinu og ætlum að halda því áfram. Þarna sáum við einfaldlega viðskiptatækifæri sem okkur leist vel á,“ segir Steingrímur.

Í umfjöllun Markaðarins frá því í mars kom fram að stórar bílaleigur myndu bregðast við erfiðara rekstrarumhverfi með því að kaupa 20-30 prósent færri nýja bíla í ár.