Stefán Gíslason hættur með Leikni og tekur við liði í Belgíu

Þjálfarabreytingar hafa orðið hjá Leikni í Inkasso-deild karla en félagið tilkynnti þetta með yfirlýsingu á heimasíðu félagsins nú í kvöld.

Stefán Gíslason, sem tók við liðinu fyrir tímabilið, er á leið til Belgíu þar sem hann tekur við liði þar í landi en ekki kemur fram hvaða lið það er.

Stefán hefur bæði þjálfað Leikni og Hauka hér á landi en hafði gert fína hluti með Leiknis-liðið sem situr í 7. sæti Inkasso-deildarinnar. Hann er ekki ókunnugur Belgíu en hann lék þar og spilaði um árabil.

"Það er eftirsjá af Stefáni sem tók við Leikni síðasta vetur en hugmyndafræði hans og félagsins lágu virkilega vel saman. Honum er þakkað fyrir afar góð störf fyrir félagið og óskað velfarnaðar."

Viðtal við Stefán birtist á https://t.co/zYyY8etWNG á morgun!

— Leiknir Reykjavík FC (@LeiknirRvkFC) June 26, 2019

Við Leiknis-liðinu tekur Sigurður Heiðar Höskuldsson en hann hefur verið aðstoðarþjálfari Stefáns í ár. Sigurður hefur aldrei stýrt liði í meistaraflokki áður en verið lengi þjálfari yngri flokka.

Leiknir spilar við Keflavík annað kvöld í Inkasso-deildinni en yfirlýsingu Leiknis má lesa hér að neðan.

Yfirlýsing Leiknis:

Hlutirnir breytast fljótt í boltanum. Stefán Gíslason hefur látið af störfum sem þjálfari Leiknis til að taka við þjálfarastarfi í Belgíu.

Það er eftirsjá af Stefáni sem tók við Leikni síðasta vetur en hugmyndafræði hans og félagsins lágu virkilega vel saman. Það er leiðinlegt að horfa á eftir þessum flotta þjálfara og honum er þakkað fyrir afar góð störf fyrir félagið og óskað velfarnaðar í nýju og spennandi verkefni.

Að sama skapi fagnar Leiknir því að erlend félög séu að horfa hingað upp í Breiðholtið, enda ansi margt gott sem héðan kemur! Það er ekki oft sem íslenskum þjálfurum býðst tækifæri sem þetta.

Sigurður Heiðar Höskuldsson, sem verið hefur aðstoðarþjálfari Stefáns, tekur nú við keflinu og stöðu aðalþjálfara. Áfram verður haldið í sömu vegferð. Valur Gunnarsson markvarðaþjálfari verður honum til aðstoðar í leiknum gegn Keflavík á morgun en verið er að vinna í að fá inn nýjan aðstoðarþjálfara.

Áfram Leiknir!